Dili katubag

Dear Tita Salie,

Good day. Just call me Ms. Scorpio, 17 years of age, dalaga apan duna ko’y 1 kabuok anak. Naa ko’y boyfriend karon, tawgon lang nato siya og si Mr. Taurus ug siya ang amahan sa akong anak.

Daghan na kaayo ko og nabati nga estorya gikan sa among mga silingan nga wala daw ko mauyoni sa mga ginikanan sa akong uyab. Ug ang ako lang anak maoy gusto sa akong uyab. Apan dihang akong gipangutana akong uyab bahin niini, matud niya nga dili daw sila tuohan.

Lain usab nako nga gikalibgan, Tita, kay panahon nga mag-away mi dili man ko makatingog or dili man ko makatubag kaniya aron makapanalipod ko sa akong kaugalingon. Dili gyod ko kasulti sa ako untang gustong isulti kaniya. Igo na lang ko sa pagduko ug mohilak.

Duna say panahon nga iyang tan-awon ang akong celfon og iyang i-delete ang mga pangalan nga wala niya mailhi. Kun ako  siyang pangutan-on kun ngano, igo ra siyang moingon nga sala ba diay niya kun ingon siya niini? Igo ra kuno siyang nagmahal kanako. Kun mohilak ko, Tita, usahay mohilak usab siya. Unsa may akong buhaton? Palihog pasabta ko. Thank you and God bless.

* * *

Hi! Ayaw tagda ang mga tsismosa kay maoy ilang tuyo ang pagguba sa inyong maayong relasyon. Maoy timan-i nga wala gyoy isulti nga maayo ang mga tsismosa, dili sila kamao mo-appreciate sa tawo, mas dali nilang isulti kun unsay makadaot, kun unsay bati nga ilang nakita ug nabati nga makaguba sa mga kinabuhi sa laing mga tawo. Ayaw tuohi ang ilang mga estorya. Hinuon, pangita og paagi nga mahimo kang close ngadto sa pamilya sa imong ugab kay kun magkadayon gyod mong duha, mamahimo nimo silang ka pamilya.

Mas maayo kun mosuroy ka didto sa ilahang panimalay aron usab ilang makit-an ang ilang apo ug niining paagiha imong mahibaw-an kun duna bay kamatuoran ang ilang estorya.

Maayo usab na dili na lang ka motubay sa inyong away aron dili mosamot ang iyang kasuko. Pero dili usab maayo nga dili ka mo reason out sa sitwasyon kun sa imong pagtuo sayop siya. Maayo usab nga imong paningkamotan nga iyang makit-an ang kamatuoran ug masabtan ang imong side. Ayaw lamang siya anaa nga dili ka motingog kay tingali unya kun abusaran ka. Just speak for the truth in a way nga dili ka mangisog.

-- Tita Salie