Caroline Gula 7

Human nila’g pangaon, nagsultihanay sila si Artemio ug Carol. “Ikaw ra diay dinhi Carol? Wala ka mokuha og katabang?” wala kapugong pagpangutana si Artemio.

“Dihang wala na magpadala’g kwarta ang akong bana, gipahunong na nako pagtrabaho ang among katabang. Wala ka ba makabantay nga nahurot-hurot na gani nako og pamaligya ang among butang?” matud ni Carol.

Misamot ang kalooy ni Artemio kang Carol. “Unsa diay ang sulti sa imong bana nga wala ka na man padad-i niya og kwarta? Mituo diay siya sa tabi-tabi nga aduna ka’y kabit?” gitutokan ni Artemio si Carol nga mora’g nauwaw.

Taud-taud, nananghid na si Artemio nga mopauli na. “I-ampo nako nga maabswelto ka sa imong kaso Carol. Kontaka lang unya ko sa opisina kun mabaligya na nimo ang mga alahas aron mabayran ko nimo sa gibayad nako pagpyansa nimo,” ni Artemio pa.

Wala dayon motingog si Carol. Mitutok kini kang Artemio, paraygon kaayo ang tinan-awan. Nakabantay niini ang ambongan nga polis mao nga nagtinutokay sila’ng duha.

“Misamot ang akong pagdayeg nimo Artemio,” matud ni Carol. Nahibulong si Artemio kun nganong nakasulti si Carol niadto. “Kita ra’ng duha ang dia sa balay, kun lain pa tingali nga lalaki, gipahimudsan na ang higayon,” ni Carol pa.

“Dili maayo nga mangabuso ang usa ka lalaki ngadto sa babaye, ilabi na ako nga usa ka polis,” giingnan ni Artemio si Carol sa bugnaw kaayo nga pagkasulti. Apan takulahaw lang nga migakus na hinuon kaniya si Carol.

“Ayaw huna-hunaa Art nga miabuso ka sa imong kaugalingon, akong kagustohan kun adunay mahitabo kanatong duha karong higayona. Daku kaayo ang akong utang kabubot-on kanimo mao nga gusto ko nga mubawos. Lipayon ko ikaw Art,” matud ni Carol.

Nakalitan si Artemio sa paggakus kaniya ni Carol. Apan daw nagkaduol ang positive ug negative sa bato-balani mao nga dali ra kaayo sila nga nagkapilit. Si Carol maoy miuna sa pagpatik og hawok kang Artemio.

Takulahaw lang nga mikilab ang panahon ug nag-ukobay na ang masi’g nila ka mga ngabil. “Adto ta’s kwarto, ayaw kahadlok, kita ra dinhi sa balay ug walay makatugaw kanato’ng duha,” matud ni Carol.

Wala gayud magtuo si Artemio nga musangpot sa ingon niini nga sitwasyon ang iyang misyon sa pagdakop ni Carol. Gitagbaw ni Artemio ang iyang kaugalingon. Bisan minyo na si Carol, apan daw dalaga gihapon ang iyang pamorma nga kun sa uban pa daw wala’y tatsa.

“Make me happy, make me happy Art,” nagpangyamyam si Carol dihang gipadimdim na ni Artemio kaniya ang katam-is. - Kataposan