Kay Hunyo na lagi kuno

Nahibulong ko kang Taryata nga puwerteng lipaya. Nagsayaw-sayaw ug nagkanta-kanta nga siya rang usa sa ilang balay. Mianhi man gud ko sa ila kay kuhaon ko ang gipatahi kong sinina. Sastre si Taryata sa among lungsod sa Liloan. Dalagang guwang siya ug siya ra ang nagpuyo dinhi sa ilang karaang balay nga kabilin sa namatay niyang mga ginikanan. Bugtong anak si Taryata.

Nahimuot kong nagtan-aw niya. Wa siya makamatikod sa akong pagsulod sa sala. Unsa man kahay nakaon aning bayhana nga mora mag gikunsaran sa iyang anghel nga magbalantay?

“Naunsa ka, Taryata?”

Nakugang intawon ang dalagang guwang. Nahilaw ang iyang kinataw-an.

“Sus, pakugangan man sab ko nimo, Carmen.”

“Kinsa man say di mahibulong nimo, uy. Naunsa ka ba?”

“Hunyo na  man gud ron.”

“Kay ngano man diay kun Hunyo?” Misamot ang akong kahibulong kay nindot kaayo’g pinahiyoman si Taryata.

“Karong bulana ang gisaad ni Carding nga magpakasal mi. Mopauli siya gikan sa Saudi aron tumanon ang iyang gisaad nako.”

Nahinumdom ko  nga si Carding hinigugma ni Taryata. Taga pikas lungsod siya. Kanunay pangayoan og kuwarta ni Carding si Taryata kay estambay man kini. Way kita kay wa may trabaho. Ug si Taryata pa ang naggasto kang Carding aron makaadto kini sa Saudi. Nagtrabaho si Carding sa laing nasud isip laborer.

“Diay ba?” Miyanguyango ko.

“O lagi, Carmen. Tambong gyod sa among kasal, ha?”

“Siyempre. Amiga gud ta ug silingan pa gyod.”

Nalipay na lang ko sa gitug-an ni Taryata nako. Suwerte siya kun makasal na sila si Carding. Guwapo si Carding. Samtang si Taryata lisngag og ilong, bugason ang lapad niyang nawong, ug gawas nga tambukon siya, mubo pa gyod.

Usa ka hapon nga nagpahayahay ko sa among balkon, may mihunong nga taksi sa tungod gyud sa balay ni Taryata. Si Carding ang nanaog sa taksi. Nagdali kong mikanaog aron pangumustahon si Carding. Dihang miduol na unta ko niya, maoy say paggawas ni Taryata. Nagyapayapa sa kalipay ang akong amiga.

“My love! Nia ka na gyod!”

Gigakos og hugot ni Taryata si Carding. Gihagkan-hagkan sa aping.

“Hunyo na, My love. Salamat nga mituman ka sa imong gisaad nako nga pakaslan ko nimo ning buwana.”

Nagpaminaw lang ko. Apan nakugang ko kay mibuwag si Carding sa paggakos ni Taryata.

“Di na maoy akong gianhi nimo, Taryata. Gusto lang tikang imbetaron. Bunyag sa akong anak ugma. Dugay-dugay na kong mipauli gikan sa Saudi, uy. Nagminyo mi sa akong trato nga maoy akong one and only.”

Mihilak si Taryata. Gitulisok niya si Carding.

“Salbahis ka! Gipangwarta lang diay ko nimo!”

Nagdaling mibiya si Carding kay mingaab pag-ayo si Taryata. Nagkuha siya’g sundang aron tigbason si Carding. Apan kay wa na man si Carding, mihilak kini’g kusog. Naluoy ko kang Taryata. Giduol ko siya ug gigakos. (Kataposan)