Ang welder nga seruhano)

“Gally!” Mitawag nako ang toolpusher namong taga Texas nga si Bill Knickerbocker sa iyang pagkanaog sa pick-up gikan sa among kampo. “I’ve just passed by your dog crawling and I think he’s been shot by those Bedouins” (wandering desert nomads).

“Where is it, Bill?”

“There,” mitudlo siya, “just a few meters from your workbench.”

Midali ako pagdagan  ug didto akong nakita si Tiger, ang akong iro nga nagkamang kay di na makalakaw. Ako kining giduol, “Tiger, what’s wrong with you, boy?”

Igo lang kining mitilap sa akong kamot, busa ako kining gialsa, ug gipahimutang sa akong work-table. Sa akong paghiling, duha ang iyang samad, usa sa iyang kilid, ibabaw sa pangulahian niyang paa ug ang usa, didto sa punoan sa unahan niyang tiil. Sa akong tan-aw, kay wa na man maglihok si Tiger ug nagpiyong na lang ang mga mata, nakaingon ako, “Puslan  man nga mamatay ka Tiger, operahan tika ug kuhaon ko nang bala sa imong lawas,” dayon nakong kuha sa hait kaayo nakong Buck folding knife.

Gisugdan nako pagdisdis ang samad ni Tiger nga wa gyud maglihok busa nagtuo ko nga mamatay gyud si Tiger. Ako na lang gibana-bana kun diin ang bala dapita ug didto nako ablihi. Sa pagkakuha ko sa unang bala, ako dayon kining gibudburan og antibiotic una nako tahi-a sa dakong dagom ug hilo nga maoy gamit ko sa pagtahi sa akong pangtrabaho.

Nakuha ko usab ang ikaduhang bala ug human nako butangi og antibiotic, ako dayon kining gitahi. Sa nahuman ko na ang operasyon, ako kining gibukotan sa mga noog nga trapo sa oil rig apan limpiyo.

“Di ka gani buntagan, Tiger, wa ka gyu’y suwerte,” namulong ako sa kaugalingon. Sayo sa buntag, mibangon ako ug akong giadto ang akong iro didto sa lamesa nga iyang nahimutangan.

“Patay na man tingali,” matud ko sanglit didto gihapon si Tiger nga wa maglihok. Ug sa akong pagduol, nagginhawa man kini.

“Hay, buhi pa diay,” matud ko. “Pagpakabuhi gyud, Tiger, kay akong gibuhat ang tanan kong mahimo.”

Sa pagkadungog ni Tiger sa akong tingog, mibuka ang mga mata niini nga mitan-aw nako.

Milabay ang mga adlaw ug mibaskog pagbalik si Tiger ug sa akong pag-abag sa maayong pagkaon, nabuhi gyud si Tiger. (Kataposan)