Ampingan ang gikabuhian

Nagpadayon ang kalisod sa pagpuyo sa kinabag-ang Pilipino. Kun adunay gikabuhian bisan ginagmay lang, angayan nga ampingan kini. Lisod kaayo ang pagpangita’g trabaho karon. Dili daotan ang pagpangandoy sa haruhay nga pagpuyo. Apan kun taas ra sab kaayo dili na kini maayo.

Ang tawo ra ba nga sobra kataas sa pangandoy sagad gayod nga mapakyas. Sakit kun mapakyas. Mobiya sa trabaho kay gigamyan ra sa suweldo. Manimpalad sa gawas sa nasud. Kun buot sabton, magkinahanglan og dakong kuwarta ang pagpangaplay sa laing nasud. Laing problema kini sa kalisod.

Manghuwam og kuwarta. Ibaligya ang bisan unsang property. Apan kun hunahunaon, wala’y kasiguroan ang maong katuyoan. Kadaghan na kita makabasa sa newspaper ug makakita sa balita sa telebisyon nga alaot intawon kaayo ang tawo nga nabiktima sa pagpangilad sa ubang mga ahensiya alang sa pagpanarbaho sa gawas sa nasod.

Ang uban pa gani sa laing nasud na nila masayri nga ilegal diay ang ilang mga dokumento. Matanggong sila sa napuntahang laing nasud. Magpakilimos na lang sa mga kadugong Pilipino nga adunay legal nga trabaho didto.

Ang resulta, dili makabayad sa giutang nga dakong kuwarta. Dili kay siya lang ang alaot, apil na usab ang gitalikdang pamilya. Sa pagkakaron nga tungason kaayo ang panginabuhian sa Pilipinas, kun aduna nay nasudlang trabaho, ampingan kini bisa’g gamay lang ang suweldo. Ang importante mao ang kasiguroan sa pagpamugas matag adlaw.

Adunay panultihon nga, bisa’g katulo lang makakaon sulod sa usa ka adlaw basta ang importante nga maayo ang lawas. Husto baya kini. Ang atong lawas maoy labing mahinungdanon. Ang kahimsog sa atong lawas maoy lig-ong pundasyon alang sa kalig-on usab sa atong pamilya.

Alimahan nato ang atong trabaho karon. Dili nato kini talikdan aron sa pagpanimpalad og laing trabaho sa gawas sa nasud. Gawas niini, daghang pamilya ang nabungkag tungod sa pagpanarbaho sa bana sa laing nasud. Daghang mga anak nga nagumon sa daotang mga bisyo kay walay amahan nga naggiya kaniya.