Lunop ug Baha Gula 7

Nasabtan ni Siegfred nga gusto ni Pamela nga magdugay sila sa pag-uban niining una nila nga deyt. “Abi nimo Pam, malipay g’yud kaayo ko kun magkuyog ta’g dugay... agad lang ko nimo Pamz.”

Mitutok kang Siegfred si Pamela. Nagtinutokay silang duha. “Abi nimo Fred, gibuwagan na nako ang akong boyfriend,” gibuak ni Pamela ang hamubo nga kahilum tali kanila.

“Ha? Ngano man? Sa unsa nga hinungdan?” miiknat ang kilay ni Siegfred. “Kadtong nagkita ta sa SM nga duna ko’y giadto, ang boyfriend to nako maoy akong giadto kay mohuwam ta ko og kwarta, apan iya ko nga gibalibaran. Gipaubanan pa’g sakit nga pulong,” ni Pamela pa.

“Giingnan ra tika niadto nga nanguyab nako ang akong giadto sa SM apan ang tinuod, boyfriend na siya nako. Mas maayo ka pa kay bisan managhigala lang ta apan gitabangan g’yud ko nimo sa akong problema,” dugang sa dalaga.

Gi-deliver na ang ilang order nga pagkaon apan wala dayon sila mosugod sa pagkaon. “Dili diay siya tinuod nga nagmahal kanimo Pam kay panahon sa imong kalisod iya ka man nga gipasagdan,” tubay ni Fred.

Gipahit ni Pamela ang iyang waet. “Nindot unta kadto kun ang akong boyfriend sama pa kanimo kabuotan nga bisan wala ka pa gani makaila kanako imo na ako nga gitabangan,” matud ni Pamela.

Nakahuna-huna si Siegfred nga komedyahan niya si Pamela aron pagbuak sa kaseryoso sa ilang panagsultihanay. Mingisi si Fred ug miingon “Sa una ko pa lang nga pagkakita nimo Pam, giisip ko na ikaw nga girlfriend mao nga gitabangan g’yud tika kutob sa akong mahimo.”

Nahatutok si Pamela kang Fred. “Tinuod ka Fred? May pagbati ka ‘sab nako? You know dili unta maayo kay babaye ko, apan dili nako matago ang akong pagbati, I love you.”

Napiyong ni Fred ang iyang mga mata ug miginhawa siya’g lawom. Pagkalalim sa mga pulong nga iyang nadungog. Gipig-it niya ang kamot ni Pamela. “I love you Pamela.”

Tam-is kaayo ang mao nga sitwasyon alang kanila’ng duha. “Ako na nga gitug-anan si Mama nga nakagusto ko nimo Fred mao nga gusto siya nga makighimamat nimo pag-usab,” ni Pamela pa.

“Gikan dinhi sa restaurant Fred, mouban ko nimo bahala na og asa ko nimo dad-a. Apan ayaw sabta nga dautan ko nga pagka babaye, tungod kana sa daku nako nga pagmahal kanimo,” matud sa dalaga nga salabtonon kaayo ang tinan-awan.

Nakasabot si Fred sa buot ipasabot sa dalaga kun asa sila human sa ilang dinner. Migawas sila sa restaurant ug mipara’g taksi. “Basin magmahay ka ha? Apan sali’g nako, unongan ko ikaw,” hagawhaw ni Fred sa dalaga. - Kataposan