Maria Magdalena

Gula 109

Si Walter, ang best friend ni Daniel.

“U-uy,” nako pa. “I-ikaw man diay?”

“Puydeng anhi lang ko mukaon sa imong table, Maria?” Wala na man guy bakante,” matud ni Walter.

“Nga-nganong dili? Sige.”

Nagdungan mi og pangaon si Walter nga nagluon sa usa lang ka lamesa. Namatikdan ko nga samtang nangaon kami, mopasiplat siya kanako matag karon ug unya. Mora’g aduna pay kauwaw sa dughan.

“Kumosta ka na man?” Gipangutana ko niya.

“M-maayo man. Mao ra gihapon,” maoy akong tubag. “Ikaw?”

“Okey ra man sab. Tuod, nag-unsa ka man dinhi sa siyudad?”

“Nag-withdraw ko sa akong allotment gikan kang Daniel.”

“Aw, husto tuod, no? Nibalik na man diay si bestfriend Daniel sa gawas.”

“Oo. Ikaw, kanus-a ka man molarga pagbalik?”

“Dugay pa. Mao pay akong pagpangaplay, uy. Pahimus una ko dinhi.”

Ug gitibawas namo ang pagpangaon.

“Mahimo bang bisitahan ko ikaw sa inyo?” Nagkanayon si Walter sa dihang hapit na kami manggawas sa kan-anan. Ganahan kaayo ko sa inyong dapit kay probinsiya kaayo. Maka-relax gyud ta. Lami pud ang mga pagkaon.

“U-unsa?” Nakalitan ko sa iyang gisulti. “Nganong imo man kong bisitahan?” -- Sumpayan pa