Laing dakong gasto na usab sa gobiyerno

Dili gayod ikalimod nga dakong kantidad ang magahin sa gobiyerno sa matag eleksiyon nga ipahigayon sa atong nasud. Minilyon ang kuwarta nga makuha sa kaban sa gobiyerno tungod niini. Apan kay democractic system man ang Pilipinas, maong anaa gayod ang eleksiyon.

Mao pa gani pagkahuman sa eleksiyong lokal ug nasyonal sa miaging Mayo, nagsingabot na usab ang eleksiyon alang sa barangay sa Oktubre 28. Laing gasto na usab ang igahin sa gobiyerno alang niini.

Usa kini ka hinungdan nga maut-ot gayod ang kuwarta sa gobiyerno. Kun atong hunahunaon pag-ayo, anugon ang maong kuwarta. Mabutang nga walay kapuslanan ang ipahigayon nga eleksiyon kun ang nagpakadaog usa ka corrupt nga opisyal. Milansar ug gustong modaog dili tungod sa kaayohan sa komunidad kun dili kaayohan alang sa iyang kaugalingon lamang.

Alaot ang nasud kun maingon niini. Busa man ugaling, lisod ang pagdaog sa usa ka kandidato nga walay kuwarta. Ang makadaog mao gayod ang kandidato nga adunay kuwarta. Ug kining maong matang sa opisyal sa komunidad dili malauman nga moserbisyo sa tinarong sa gialagaran nga dapit.

Madugangan ang dili pagsinabtanay

Lab-as pa kaayo ang milabay nga eleksiyon sa Mayo, wala pa magkauli sa maayong kabubut-on ang mga tawo nga nagkaatbang sa maong piniliay. Dili lamang ang mga kandidato ang nagbungol ug nagdumtanay, apil na ang mga dumadapig ug mga supporters. Ug kining walay pagsinabtanay ug pagdinumtanay madugangan pa gayod tungod niining umaabot nga eleksiyon sa barangay sa Oktubre.

Apan kun ang mga Pilipino open minded pa lang, dili mahitabo nga magkasiloay sa maayong kabubut-on ang usa’g-usa. Angay untang hunahunaon nga ang Pilipinas nagpasilong sa democratic system. Usa ka demokrasya ang nasud nga Pilipinhon. Natural lang nga adunay eleksiyon nga ipahigayon.

Pinaagi sa eleksiyon ikapagawas sa mga Pilipino ang tagsa-tagsa ka baroganan. Tungod niini, magkasumpaki gayod ang baroganan sa mga kandidato nga dapigan ug suportaran. Ug kitang mga botante mobarog usab sa atong gidapigan nga kandidato.

Kinahanglan lamang sa mga Pilipino nga mosabot sa tinuoray nga kahulogan sa democratic system aron malikayan ang dili pagsinabtanay sa usa’g-usa sa panahon sa matag eleksiyon nga ipahigayon sa Pilipinas.