Ang buang nga nangalawat

Daghan nang nangalawat sa mesa sa Pista sa Segunda Patrona nga si St. Joseph Cupertino, sud sa simbahan sa Parokya ni Sto. Tomas de Villanueva. Apan wa kini ikalipay ni Fr. Pader, nga mao ang Kura Paroko.

Tungod kay wala gyu’y usa ka tawo nga nangalawat nga nagpahungit  sa ilang baba. Ang tanang hostiyas nga angay lang unta ihungit sa mga baba, gipangdawat na man lang nuon sa mga tawo sa ilang wala nga palad ug unya kuhaon sa ilang tuong kamot ug sila nay mohungit sa ilang isigka-baba.

Samotan pang ang katapusang nangalawat usa ka buang-kagidlay ang saput, kagubot ang buhok, kayamukat ang nawong. Dili na lang unta kini niya papangalawaton. Apan may gibug-aton ang nabatyagan niya sa iyang kasing-kasing pag-ingon sa buang nga “M-Mangalawat ko, Padre.” May katungod usab kining tawhana nga mokalawat kay tawo usab siya. Nawad-an pa gyud sa maayong pangisip. Busa mikuha siya’g usa ka hostiyas ug gitunol sa kamot sa buang.

Apan gibaklid sa buang iyang kamot ngadto sa iyang likod ug mihiko-hiko nga minganga sa iyang baba. Nagpasabot nga magpahungit siya sa Pari. Aguy! Nakita ni Fr. Pader, ang mora na’g yellow corn nga mga ngipon sa buang.

“Lawas ni Kristo,” mitubag usab ang buang og “Amen.”

“Giayo gayud og hungit ni Fr. Pader, ang hostiyas ngadto sa baba sa buang nga di madapat iyang mga tudlo sa ngipon niini. Apan nadapat gayud iyang tudlo sa ngabil niini.

Kapamalikason siya. Pagbalik niya sa Altar gisinyasan niyang sakristan nga paduolon ug iya kining gihunghongan nga mangayo siya’g alcohol nga ihinaw sa iyang kamot.

Nakita niya ang buang nga gakiang-kiang sa paglakaw dungan ang pagpangagulkol sa mga basiyo sa lata nga gipangbitay niya sa iyang sinina ug gipangsablay sa iyang abaga padung gawas sa simbahan. Dili kini taga diri. Wala siya makaila niini.

Human sa Santos nga Mesa, mipadung si Fr. Pader sa mga lamesa nga gipahimutang sa tugkaran kilid sa simbahan.Ug gipanalanginan ang mga pagkaon nga giandam sa mga Parokyano alang sa usa ka salusalo sa Pista.

Dunay kan-on humay, kan-on mais, puso, inasal, humba, valenciana, pochero, bam-i, letsong manok bisaya, kaldereta ug balbacua. Diha poy mga salad, softdrinks, beer ug emperador. Nagpuli-puli lang gud sila’g panug-ab paglabay sa pila ka minuto  nga hinabhabay.

Niining higayona baso na poy nagpinangkaay. Nakit-an na pod ni Fr. Pader ang buang diha sa punoan sa kahoy nga mantalisay naglingkod sa semento nga lingkoranan nga katawa-katawa nga nagyawyaw. Ug kalit kining mikanta ug...

“Buta kita sa pagpakabana, buta kita sa luha. Ug way kapuslanan ang kahayag sa atong mga mata kung sa kasing-kasing magpabilin tang buta....”

Ug nahalingi silang tanan sa kanindot sa tingog sa buang nga mora’g si anhing Eddie Peregrina ang tingog. Mikuha dayon si Fr. Pader og mga pagkaon nga gisud sa plato ug softdrinks ug iya kining gihatag sa buang. Mao man guy iyang nasabtan nganong mikanta kinig “Buta”. Nagpadungogdungog tingali nila ang buang ngadto nila nga pwerting pangaon ug wa gyud siya sangpita.

“D-Di ko, Dre. Busog na ko. Salamat!” balibad sa buang dihang gitunol ni Fr. Pader ngadto kaniya ang mga pagkaon.

“Nakakaon na diay ka? Diin man ka kaon? Wa man lagi ko kita nimo nga misagol pagpangaon, namo?” tingala ni Fr. Pader.

“Kita ka Padre, uy. Imo gani kong gihungitan,” ngisi sa buang.

“Gihungitan tika?’ samot og kalibog si Fr. Pader.

“O, ingon gani ka “Lawas ni Kristo” ingon pud ko’g Amen”.

“Husto.” Yango-yango ni Fr. Pader.

“Wa pa diay mo nabusog adtong kaona, Dre? nga dagko pa man mo kaayo kaon ron?” padayong ngisi sa buang. Kalit nga nahubog si Fr.  Pader. Usa ra man unta kuno ka shot sa emperador, iyang nainom. (Katapusan)