Patya ko tungod sa gugma

Naghinamhinam si Michelle ug Rolando nga magpaabot sa ilang kasal. Kay lagi sunod tuig pa man ang kasabutan sa ilang mga ginikanan. Pwerting lipay sa duha kay gipangandoy nga sila gyod ang magkadayon.

“Michelle, karon nga kita kaslonon na dako kaayo ko og kalipay,” ni Rolando nga migakos sa dalaga.

“Mao usab kana ang akong gibati nga kalipay Rolando,” ni Michelle nga mapahiyumon.

“Tuod, diay Michelle, aduna diay koy igsoon sa Amerika. Mouli to siya inig kasal gyod nato,” pahayag ni Rolando.

“Rolando, pila man diay mo ka magsuon?,” sukot ni Michelle.

“Michelle, ako kining isurpresa kanimo ang akong igsuong lalake nga si Rocky kay kami ra mang duha ka managsuon. Ug hilabihan ka buotan niini,” tubag ni Rolando.

Wala magdahom si Michelle nga mangasawa si Rolando kaniya. Tungod kay kini si Rolando nagkabakasyon lang sa ilahang lugar. Ug kini si Rolando taga Tarlac City.

Sa pagpanglabay sa mga adlaw wala lang hibaw-i nga ugma na ang ilang kasal adlaw’ng Domingo.

“Michelle, manuroy ta didto sa siyudad total ugma pa bitaw ang atong kasal,” ni Rolando nga mapugsanon.

“Rolando, ayaw na lang kaha, kay matud pa sa katigulangan ngil-ad kuno nga magsuroysuroy nga kaslonon,” tubag ni Michelle nga mabalak-on.

Wala gyod mopatuo si Rolando. Mao nga ni kuyog na lang si Michelle. Ug didto sa siyudad nagsuroysuroy. Apan sa wala damha ang panghitabo may kalit lang nagdinaganay nga mga tawo sa palibot. Ug may nilanog nga buto sa armas.

Naigo si Rolando sa saag nga bala sa nanag-away nga mga batan-on. Sa pagkakita ni Michelle nga  naglunang sa dugo ang iyang hinigugma, para kaniya mora siya og naigo sa mapintas nga linog ug ni uyog ang tibuok kalibutan. Tungod kay ang iyang hinigugma mawala naman sa dayon.

“Rolando, mahal ko kaslunon naman unta ta pero nganong nahitabo  man kini,” ni Michelle nga nibakho sa paghilak.

Sa adlaw’ng Domingo nga mao na unta ang ilang kasal. Niadto siya sa simbahan kay nag-ampo. Sa tanto niyang paghilak nga nag-ampo sa simbahan, may nakita siya sa unahan ug napahasiga ang iyang mga mata kay si Rolando man ang iyang nakita.

“Rolando, nganong nia ka?” sukot ni Michelle nga nakugang.

“Michelle, ayaw kahadlok, ako kang pasabton. Dili ako si Rolando nga imong nakita. Kun dili ako si Rocky ang iyang kaluha, ug naalaan lang nimo nga si Rolando,” pasabot ni Rocky nga kaluha ni Rolando.

Dangtan og pipila ka mga gutlo nilakaw ang ulitawong kaluha ni Rolando nga si Rocky. Ug nagpadayon si Michelle sa simbahan sa pag-ampo.

“Diyos ko, ngano man nga imong gikuha ang akong hinigugma. Puslan man nga nawala si Rolando kanako. Kun mahimo patya ko tungod sa gugma,” saysay ni Michelle nga nidahili ang mga luha sa kaapingan. (Kataposan)