Dili na mo-text

Dear Tita Salie,

Have a nice day. I really like your column mao nga kada adlaw gyod ko nga magbasahan og Banat News. Alang kanako dako kaayo ka og tabang kanamong mga batan-on karon. Tungod kay lisod kaayo ang kahimtang sa atong mga kabatan-onan. Hinungdan nga daghan ang mga nahisalaag sa dili hustong dalan ug daghang mga badlongon.

Tagoa lang ko sa ngalan nga Ms. Scorpio, usa ka dalaga ug dunay hinigugma. Magpatambag ko nimo, Tita, kay wala na man ko kasabot niya god. Sa una dihang bag-o pa mi nga nagkauyab magsige gyod siya og pamisita diri sa among balay. Halos kada adlaw mosuroy gyod siya aron iya kong makit-an.

Pero karon nga 3 na mi ka bulan dili na man siya mosuroy sa among balay ug wala na gyod mi magkita. Dili na siya mo-reply kun teksan ug dili na usab motubag kun akong tawagan.

Usa kahigayon nagkita sila sa akong friend ug gipangutana siya kun kami pa ba gihapon. Mitubag kuno ang akong uyab nga kami pa kuno gihapon hangtod karon. Apan dili  lang ko kasabot tungod kay wala na man siya pakita ug dili na mo-text.

Unsa may akong buhaton, Tita, kay naglibog na gyod ko. Thank you very much and more power.

* * *

Dearest Ms. Scorpio,

Ayaw una paghimo og hukom samtang wala pa nimo siya ikaestorya sa personal o kaha matawgan sa cellphone. Kay wala pa kita masayod sa tinuod nga hinungdan nganong kalit siyang nausab, ug dili na mo-text kanimo.

Mas maayo seguro nga imo siyang hatagan og pila ka bulan nga mopakita diha kanimo ug ipasabot kanimo ang hinungdan kun nganong naingon siya niadto. Kun dili na nimo mapugngan, puyde nimo siyang tawagan ug kumustahon aron imong masayran ang tinuod nga hinungdan. Diha na nimo hunahunaon kun imo ba siyang madawat tungod sa iyang rason.

Pero bisan gani ang pagtawag kaniya dili na unta nimo hunahunaon tungod kay babaye ka. Ug kay ikaw man ang babaye maghulat ka lang unta nga siya ang manawag kanimo. Pero kun mao kini ang imong buhaton hangtod kanus-a ka man maghulat nga motawag siya. Angay kang mopadayon sa unahan kay tingali unya kun lahi na ang iyang direction ug giwagtang ka na sa iyang mga plano sa kinabuhi.

Pero kun wala gyoy reply gikan kaniya ug wala na gyod siya magpakita kanimo panahon na seguro nga imo siyang hinayhinayan paghikalimot. Ipadayon ang kinabuhi, ug ayaw kabalaka kay duna pay daghang nindot nga moabot unya kanimo.

-- Tita Salie