Abtik sa tsiks

Gula 2

Dali ra nga miabot sila si Clifford ug Fatima sa Sitio Maaslum nga nahimutang sa bukid na nga bahin sa Barangay Busay. Sa tabang ni Clifford natultolan usab nila ang balay sa iyaan ni Fatima.

Nahimutang sa bakilid nga bahin sa bungtod ang balay ni Manang Susing. Naghangpanay sila si Fatima ug ang iyang iyaan nga nalipay nga gibisitahan siya sa iyang pag-umangkon.

Taud-taud mitingog ang selpon ni Clifford. Gidali kini pagkuha sa ulitawo. Ang iya diay’ng barkada ang nanawag.

“Dia ko sa Sitio Maaslum bai kay dunay chicks nga gitabangan nako aron makit-an ang balay sa iyang iyaan. Moapas lang tingali ko ninyo,” giingnan ni Clifford ang nanawag kaniya.

Nangutana si Fatima kun kinsa ang nanawag ug gitug-anan ni Clifford nga ang iyang mga barkada nga gikasabot niya nga mangaligo sa dagat.

“Unya nabiyaan ka na hinoon Cliff,” may kahingawa ang tingog ni Fatima. “Sigi lang, walay problema Fat, moapas lang ko unya,” ni Clifford pa.

Gibati og kaikog si Fatima nga tungod kaniya nabiyaan si Clifford sa iyang mga kauban. “Sagdi lang Cliff, asa ba kamo maligo, apason lang nato sila dia bitaw ta’y kasakyan,” matud ni Fatima.

Nahinangop si Clifford nga nakadungog sa tanyag sa dalaga. “Sigi, mas maayo ‘sab hinoon nga kauban ta kay aron ipaila-ila tika sa akong mga barkada,” matud ni Clifford.

Mga alas onse na sa buntag nga namiya sila si Fatima ug Clifford gikan sa Sitio Maaslum. “Sa Marigondon mangaligo ang akong mga barkada Fat,” matud ni Clifford samtang naglugsong na sila paingon sa JY.

“Dili kaha ko mauwaw sa imong mga barkada Cliff? Basin og bugal-bugalan ko nila,” matud ni Fatima. “Mga buotan ang akong mga barkada Fat, sama nako ang ilang batasan, pulos mahigalaon,” ni Clifford nga milingi kang Fatima nga nag-angkas sa motor.

“Bitaw, buotan ka g’yud tinuod kay kun wala ka pa, dili dayon ko makatultol sa balay ni tiya,” dali nga tubag ni Fatima. Alang ni Clifford mora’g giswerte siya karong buntaga kay gikaila niya si Fatima.

Walay usa ka oras, didto na sila si Fatima ug Clifford sa Marigondon. Naputos sa komedya si Clifford sa iyang mga barkada nga nakakita nga may gikauban kining babaye.

“Maayo ka g’yud sa tsiks bai uy. Diin na man ‘sab nimo na makit-i bai,” matud sa barkada niini nga si John nga mihunghong kang Clifford.

Gipaila-ila ni Clifford si Fatima sa mga barkada. “Maligo ta Fat,” giagda ni Clifford si Fatima “Sigi, maligo g’yud ko kay dia man ko’y gidala nga ilisan sa akong back bag,” ni Fatima pa nga mipahiyom. - Sumpayan