Hulog gikan sa langit Gula 7

Sangko sa langit ang kalipay nga gibati ni Roel nga wala siya paantosa ug gisugot siya dayon ni Lalaine. “Sus maayo pa’g gipanguyaban na lang tika’g maayo nga nagkuyog pa ta kay maka-kiss g’yud unta dayon ko,” matud ni Roel nga tugob sa kalipay ang dughan.

“Sige  lang gud asa ra man unya na’ng kiss. Ugma diay Sunday man gusto ka nga magdeyt ta?” si Lalaine pa ang misukna ni Roel. “Oo ba, kalipay nako nga magkuyog ta bisan pa’g karon kun manuroy ta’g balik,” ni Roel.

Nagkasabot ang bag-ong maghigugmaay nga inigka-ugma na lang sila manuroy kay Domingo. Sa iyang pagkatulog nianang gabhiona, giduaw g’yud og matam-is nga damgo si Roel nga nanuroy na kuno sila si Lalaine.

Didto sila manuroy niadtong dapit nga daghang mga matahum kaayo nga mga bulak diin gisubli nila sa paglitok ang mga pulong sa pagmahal. Gigakus ni Roel si Lalaine ug kay wala may laing tawo sa mao nga dapit wala siya magpanuko sa pag-ukob sa mga ngabil sa gwapa nga dalaga.

Apan kalit lang mihagtik ang ulo ni Roel nga gibunalan og kahoy sa tawo nga kalit lang miabot. “Pagbantay Roel, siya ang giingon nako nimo nga akong boyfriend!” milanog ang singgit ni Lalaine nga maoy nakapahigmata ni Roel sa paghinanok.

Miinom og tubig si Roel kay gikulbaan kaayo siya sa iyang damgo. Gihuna-huna niya kun unsa kaha’y buot ipasabot sa maong damgo. Nakatulog ra usab siya pagbalik apan wala na niya damgoha pa si Lalaine.

Pagka-ugma, excited na kaayo si Roel sa ilang deyt ni Lalaine. Mitingog ang iyang selpon. Si Lalaine diay ang mi text kaniya. “Good morning sweetheart, don’t forget sa atong deyt ha? Sa Fuente Osmeña ra ta magkita mga alas tres sa hapon.”

Sa ilang panagkita, daw nakapanglad-ok sa laway si Roel nga nagsud-ong ni Lalaine nga hilabihan kaanyag sa gisul-ob niini nga karsones-maong ug gi-insert ang iyang T-shirt. Porma kaayo ang iyang lawas, ilabi na ang daku niini nga sampot.

Wala pa kaayo’y tawo sa Fuente. Nangita sila’g lingkoranan nga bakante ug landong. Didto sila nagtupad. Nagtinutokay silang duha. Gibusog pag-ayo ni Roel ang iyang mga mata sa kaanyag ni Lalaine.

Dayon sa tanto nila nga pagtinutokay, wala nila tuyoa nga mibathay ang matam-is nga pahiyom sa ilang mga panagway ug sa unang higayon nagtagbo ang masi’g nila ka mga ngabil.

“Sus mabuang ko sa kalalim nga naka-kiss ko nimo. Kun wala pay laing tawo dinhi Laine girubo na tika sa matam-is nga romansa,” matud ni Roel. Mipahiyom si Lalaine. “Di mamalhin ta’g laing lugar nga walay makatugaw nato,” matud ni Lalaine dayong gunit sa kamot ni Roel. - Kataposan