Bulawan tumoy sa silhig

Puno na ang mga lingkoranan sa St. Arnold Cultural Center. Sa atubangan, nanglingkod ang mga graduates, kinsa pulos nagsul-ob og toga. Didto sa kinaunahang linya sa mga lingkoranan duol sa stage, wala mahimutang si Javy. Gireserba ang maong dapit alang sa mga ginikanan kang kansang mga anak migraduwar nga may mga titulo ang diploma nga nakatatak: ‘Summa Cum Laude, Magna Cum Laude ug Cum Laude’.

Dili para ni Javy ang maong dapit. Pero, nganong nia man gyod siya palingkora ni Lino? Wala pa ra ba niya makit-i ang ulitawo. May asyeret lang nga misugat ni Javy sa iyang pag-abot ganina ug mikuyog-tudlo hain ang silya nga gireserba ni Lino alang kaniya.

Di magkaila sa personal silang Lino ug Javy. Nahibulong na lang si Javy dihang sa miaging semana, kalit lang mibutho ang batan-on sa ilang balay ug gihangyo si Javy nga pa-atenon sa Graduation Day sa taga St. Arnold University. Gipangutana ni Javy si Lino kun usa ba kini sa mupaso? Apan igo ra siyang gisultian nga: “Basta, adto lang gyod, Noy, kay may isurpresa ko nimo!”

“Unsa kahang surpresaha ang giingon ni Lino nako, no?” Sukna ni Javy sa iyang kaugalingon dihang...

Gianunsiyo sa tigpaila didto sa stage ang mohatag og pakigpulong, kinsa usa sa mga graduates ug mao ang ilang Summa Cum Laude. Nakurat si Javy sa iyang nakita. Si Lino mao diay kinahawran sa migradwet karong tuiga? Mao ba kini ang tumong nganong giawhag siya niini sa pagtambong gyod? Mao ba kini ang surpresa nga giingon ni Lino alang kaniya? Wala makasabot si Javy sa iyang gibati. Naglibog siya nganong giimbitar man siya ni Lino nga wa man gani siya makaila sa tinuoray nga pagkatawo niini?

Unya milanog ang tibuok ug malumong tingog ni Lino. Tanang mata, tanang dalunggan ug tanang atensiyon gisuyop sa daw bato balani niyang pagpakigpulong. Lakip si Javy, way pupamilok nga namati sa matag pulong nga manglibkas sa baba ni Lino.

Dinhi, nasayran ni Javy nga si Lino sayo diay’ng nailo sa mga ginikanan. Singko anyos pa siya, kaantigo na siyang mogunit sa silhig ug daspan. Nagpa-boy siya aron lang mabuhi. Ubay-ubay’ng amo ang iyang naagian. Kasagaran kanila, malupigon ug mapahitas-on. Nagtuo si Lino nga hangtod sa hangtod mao na kini iyang papel sa kinabuhi dihang usa ka adlaw niana samtang siya nanilhig, nakahig sa tumoy sa silhig ang usa ka linabay’ng panid sa Banat News. Wala tuyoa, iya kining gipunit ug gibasa. Nagustohan niya ang unod sa maong artikulo. Nagtug-an kini kaniya nga: ‘Poverty is not a hindrance to success’. Sukad niadto, magsige na siya’g basa’g Banat News, diin ang unod sa iyang gibasa maoy gihimo niyang iwag sa pagpakabuhi ning danglog nga kalibotan.

“Ug wa ko magmahay sa akong gihimo.” Padayong saysay ni Lino didto itaas sa entablado. Tungod kay mao kini ang naghatod nako ning akong nahimutangan karon. Ang naghatag nakog’ mga bulawan nga ania nangumbitay sa akong liog. Tinuod gyod ... nga ‘May bulawan ang tumoy sa silhig.’ Tinuod gayod ang dugokan nga maoy gigamit sa tagsulat kang kansang kalantip sa iyang dagang maoy gihimo kong lamparilya sa akong pagtuon. Gani, gitipigan ko man ang mao niyang sinulat sulod sa akong kasingkasing. Oo, utang ko kaniya kining kalamposan nga akong nakab-ot karon. Busa, nagpasalamat ko dili lang tungod sa iyang mga sinulat; kondili, sa iya gyong pagtambong mismo ning atong graduwasyon.”

Unya, nanaog si Lino sa bantawan, giduol si Javy ug gipaila sa tanan. Dayon, gigakos siya ni Lino ug sa nanglaghaw’ng tingog mitiyabaw: “Noy, daghang salamat sa mga bulawan tumoy sa imong silhig.” Ug wala kapugngi ang pagdahunog sa mitaob nga mga palakpak, taghoy ug siyagit sa tumang pagdayeg. (Kataposan)