Hulog gikan sa langit - Gula 4

Gusto nga sakyan ni Roel ang kanunay’ng walay maayong pagsinabtanay nila ni Lalaine ug sa iyang boyfriend. Nakahuna-huna siya nga bugtian niya og pagpangga ni Lalaine ang walay maayo nga pagtagad sa boyfriend niini ngadto sa dalaga.

“Dakung sayop ang gihimo sa imong boyfriend kanimo Lalaine nga awayon ka niya kanunay imbis iya ka nga panggaon. Kun ako’y mahimo nimo nga boyfriend, lunlon kalipay ang akong ipatagamtam kanimo,” matud ni Roel.

Mipahiyom si Lalaine nga nakadungog sa pamahayag ni Roel. “Bohemyo ka g’yud diay sa mga babaye no? Kay karon pa gani kita nga nagkaila mora’g imo na man ko nga gipanguyaban,” matud ni Lalaine dayong suyop niya sa mango shake.

Wala na tubaga ni Roel ang paghingan ni Lalaine kaniya nga usa ka bohemyo sa chicks. Ang tinuod palakero g’yud kaayo si Roel ug mao gani nga gibawsan siya ni Mariven nga nangita’g laing boyfriend kay nasakpan man siya nga adunay laing girlfriend.

Sa unang higayon sa panagbuwag nila ni Mariven gisakitan g’yud si Roel kay dili man niya ikatago nga may pagbati na siya niini. Kini gani ang rason nga pagkakita g’yud niya kang Lalaine nga kaamgid og dagway ni Mariven, daw naglumpayat ang iyang kasing-kasing.

Gitutokan ni Roel si Lalaine nga nagsigi’g suyop sa mango shake. Porma kaayo ang mga ngabil sa dalaga nga alang kang Roel nindot kaayo nga ukoban sa iya usab nga mga ngabil. “Gikan dinhi asa ka man mopaingon Laine?” matud ni Roel.

Mitutok usa si Lalaine kang Roel sa wala pa motubag. “Basin mopauli na lang ko kun abuton na og kapuol.” Nasabot ni Roel nga walay lingaw ang dalaga ug gusto lang kini nga magpalabay sa oras mao nga iya kining gipahimuslan ang higayon.

“Kun gusto ka, mag-window shopping ta ug mamalit kun dunay magustohan,” giingnan ni Roel ang dalaga. Wala g’yud tuod mobalibad si Lalaine sa pagdapit ni Roel kaniya nga magkuyog sila sa pag-window shopping.

Sa unang higayon mora’g bakikaw kaayo alang kang Roel nga nakigkuyog siya ni Lalaine apan dihang nasuta niya nga mahigalaon diay kaayo ang dalaga, anam-anam nga milambo ang ilang panagsuod.

Misulod sila og baligyaanan sa mga selpon. Nasabot ni Roel nga mora’g nakagusto si Lalaine niadtong touch screen nga cellphone. “Unsa diay imong selpon Laine?” gipangutana ni Roel ang dalaga.

“Bati lagi kaayo, dili touch screen. Mahal man gud ang touch screen wala pa ko’y budget,” ni Lalaine pa. May nahuna-hunaan si Roel. “Ako la’y bayad, gusto ka ana nga selpon?” giingnan ni Roel ang guwapa nga dalaga. (Sumpayan)