Nag-pills

Dear Tita Salie,

Have a nice day. Just call me Arriane, 21 years of age and still single. Duna koy uyab karon nga bag-o pa lang nahuman pag apprentice sa barko. Dugay na kaayo ang  among relasyon. Nagkaugab na mi dihang nagtungha pa lang kami sa college.

Kining akong boyfriend hilabihan gyod ka seloso. Bisan ang akong mga suod nga amigo iyang selosan. Seloso siya ug usahay wala na gyod sa lugar.

Karon nagsige na mi og buhat sa buluhaton sa mga magtiayon ang sex.  Unya iya kong gipainom permi og pills kay mahadlok man siya nga tingali og mabuntis ko. Nahadlok usab akong magmabdos busa nisugot na lang kong mag-pills.

Karon panagsa na lang siyang makigkita kanako ug morag wala na siyay pakialam kanako. Kun ako siyang hagdon nga manimba mobalibad na siya kay wala daw siyay kwarta para pleti.

Morag nawad-an na ra ba ko og love kaniya, Tita. Dili nako ganahan kaniya tungod kay wala na man siya’y pakialam kanako. Apan nahasol ko kay kun mananghid ko nga molakaw dili siya mosugot kay wala daw siya’y salig kanako.

Naglibog na gyod ko kun unsay akong buhaton, Tita. Palihog pasabta ko. Thank you very much and more power to your page.

* * *

Dear  Arriane,

Ang pikas lang nga side sa coin ang imong nakit-an sa inyong sitwasyon, hinungdan nga alang kanimo usa kini ka problema tungod kay wala na siya’y pakialam diha kanimo nga wala unta uyab man kamo.

Kun imong tan-awon ang lain nga side di ba dapat kang magpasalamat tungod kay wala kanay gana kaniya, matud mo nga nawad-an kana og kadasig sa inyong relasyon. Buot ipasabot niini nga mitabang kanimo ang kahigayonan aron dili kana maglisod paghikalimot sa imong boyfriend. Dili sama sa uban nga patuloan pa og daghang mga luha aron maka-move on gikan sa usa ka relasyon nga naguba.

Kun ingon niana ang matang sa imong boyfriend pasagdi siya. Ug mas maayo nga imo siyang sultian pinaagi sa text ug imong pahibaw-on sa imong desisyon. Nahimo nimo ang maong desisyon tungod kay wala kana makauyon sa iyang gipakita diha kanimo. Buhata kini aron siya makaamgo ug aron sa sunod niya’g relasyon magmabinantayon na siya ug dili na niya pasagdan ang umaabot niyang girlfriend. Kay kun dili niya masayran ang iyang batasan daghan pa unyang mga babaye nga mag-antos sa iyang batasan.

-- Tita Salie