Sabbatical leave

Sugo sa naandang buhat nimata si Padre Amaro aron momisa. Apan lahi na kining misaha. Kini na ang iyang katapusang Misa. Katapusan kay nakahukom na siya nga iya unang hukason ang iyang sotana sulod sa pipila ka mga katuigan aron pangitaon ang kahulogan sa kinabuhi nga wala niya hikit-i diha sa pagkapari.

Gimahal niya ang pagkapari ug gani, tinguha niya nga matigulang ug mamatay gyud unta siya ingon nga pari. Sa seminaryo iyang gihatag ang kinatibuk-an sa iyang kaugalingon, ang iyang mga grado nagmatuod man niini. Sa iyang mga pastoral assignments iyang gitugyan ang iyang kaugalingon ug ang iyang mga agi nimatuod man niini.

Apan adunay mga wala damhang mga panghitabo nga bisan kinsang maalamon ang mahimong maboang sa makadiyot. Nahimong uga ang iyang espirituhanong kinabuhi. Apan kinahanglang iyang atubangon ang tanan bisan pa man siya sakitan. Bugtong paagi kini aron mamahimo siyang gawasnon sa iyang kahimtang.

Ania siya karon magmisa sa katapusang higayon. Andam na ang iyang mga bagahe. Bug-os na ang iyang hukom, nakapananghid na siya sa iyang Obispo sa iyang laraw. Alang kaniya kanunay ang Dios sa iyang kinabuhi. Aduna lang siya’y buot tan-awon ug pamatud-an. Kamatuoran nga dili mahimong matubag sa lantip niyang salabutan kun dili pinaagi sa pinitik sa iyang kasingkasing.

Hapon. Nibukas ang pultahan sa yanong balay sa dakbayan. Kuyog sa pahiyom sa maanyag nga babaye ang mga lusok sa mga dagkong luha. Hugot silang naggakos, nag-ukob ang ilang mga ngabil sa makadiyot.

“Therese, dili na mahitabo nga magbulag pa kita!”

“Salamat Amaro! Salamat!” bugtong nalitok sa babaye, nisikad ang linalang sulod sa iyang sabakan. Samtang didto sa talad kan-anan anaa ang sulat sa pagdawat gikan sa kompaniya nga iyang gi-aplayan. Sakit man tuod ang kamatuoran apan dili mahimong bakakan mismo ang imong kaugalingon. Gilaylay nilang duha ang mga linya sa awit nga buot nilang balik-balikon mata’g karon ug unya:

You are the Love of My Life, You are the Love of My Life, You are the Love of My Life! I want to spend the rest of my days, just loving you!!! Ug dili na mahitabong isul-ob pa ang sotana kay nakahukom na man siya. (Kataposan)