Ang tubod sa sityo Tango-Bangkil

Kusog ang inagos sa tubod nga nahimutang sa may puting pangpang nga gitugkan sa karaang baliti. Tin-aw kaayo ang tubig niining maong tubod ug hilabihan ka bugnaw. Ug dinha sa may kinaubsan nga  bahin sa  nagdaligdig nga tubig may naporma nga lawom nga lim-aw ug anhi dinhi maligo ang mga langgam ug unya anhi usab mang-inom ang mga idlas nga mga mananap sa banika.

Usa ra gyud ka tawo ang nakapangahas sa pagkawos og tubig dinhi sa tubod sa puting pangpang ug kini mao si Rumanol. Hinuon dili gyud matawag nga husto sa panghunahuna kini si Rumanol kay may pagka-batabataon man. Kadaghan na siya pahimangnoi sa iyang nanay Lucia nga dili gyud moadto sa tinubdan kay kining maong tinubdan mao ang kaligoanan sa mga mangtas nga ungo dinhi sa sityo Tango-Bangkil.

Daghan nang nakakita nga ang mga mangtas sayo kaayong mangaligo dinhi ug uban adto na mangaligo sa tungang gabii ug dayon manghaplas sila sa ilang lana ug dayon mangabat. Apan gahi’g ulo si Rumanol kay lagi kuwang man intawon sa pamuot.

“Uy, ang amaw nga ulitawo, naligo, unsa man ato siyang dad-on didto sa atong pinuy-anan ug unya atong patakdan, mga kauban kong mga mangtas?” matud sa usa ka mangtas nga mora’g giila nilang dakodako sa ilang grupo.

“O, sige, Ramonila, ato nang dad-on kanang amaw inig human nato’g kaligo dinhi sa tinubdan,” nagkanayon kadtong usa ka mangtas nga tag-as kaayo’g bangkil. “Heeee, heeee, maayo ning tawhana kay dako’g lawas, apan way buottt...!”

Tuod ilang gidala si Rumanol sa ilang pinuy-anan ug didto ilang gipakaon sa patakod nga pagkaon. Nakatulog si Rumanol. Pagmata niini, miliraw ang mga mata niini. Unya namulong, “haaa, uhaww ayoo koooo, gustoooo kooo inom tubig bugnawww..”

Atong paimnon og dugo sa tawo,” matud niadtong usa ka mangtas nga taas kaayo’g bangkil.

“Ayaw, dili nato siya paimnon og dugo sa tawo,” matud ni Ramonila. “Usa kini siya ka amaw, peligro kaayo’g mahimo ni siyang usa ka badlungon nga mangtas ug dili na mopatuo nato, di ba?”

Nahilom ang mga ungo. Unya ilang nakita nga gidala ni Ramonila si Rumanol didto sa iyang lawak ug nasabtan nila nga nahigugma si Ramonila sa amaw kay ambongan kini.

Gisundan siya sa iyang tatay ug nanay ug didto ilang nakita si Rumanol nga naglangoylangoy kuyog sa mga mangtas ug ila pa gyung nakita nga gigakos si Rumanol sa usa ka babayeng mangtas ug gihagkan ang mga ngabil niini. Ug kay nakamatikod ang mga mangtas nga dihay duha ka tawo nga nagpaantaw dili halayo sa linaw, kalit silang mihaw-as ug ilang gidasmagan ang nanay ug tatay ni Rumanol.

“Ayawwww, ayaw ninyo hilabti ako tatay ug nanayyy,, kun inyo silang hilabtan ako inyo na kontraaa....grrrrrr...grrrrr...grrrrr.... wakkkkk, wakkk” ug mihaw-as si Rumanol nga usa na ka bangis nga dakong iro. Ug nagkarambola ang mga mangtas dinhi sa linaw.

Nahimong pula ang tubig sa linaw nga nasagolan sa mga dugo sa nangamatay’ng mangtas nga nalupig ni Rumanol. Unya, iyang gisakwat ang nagkadugong Ramonila nga mora’g luya na kaayo kay diha molaban ni Rumanol. Iyang gidala sa nag-agos nga tubig sa tubod ug nahumod silang duha. Taudtaod naulian silang duha ug unya mibalik sila sa normal nga tawo. (Kataposan)