Ako ka lang, Romana

Naghinuktok si Robert sa iyang lawak. Di siya makatuo nga sa dugay na nilang panagtipon ni Romana, budhian siya sa hilom niini.

“Karong Biyernes, magkita ta sa Pusok Waiting Shade untop alas 6:00 sa gabii.” Mao kini ang nabasa ni Robert sa selpon ni Romana kagabii dihang gisekreto niya pag-abli ang inbox. Nasayod siya kinsa ang tag-iya ning maong mensahe -- si Bogart, ang kanhi kalib-in ni Romana.

Dili happy si Romana sa kiliran ni Bogart, kinsa usa ka drug pusher. Pirmeng bun-ogon ang babaye labi nag makahithit ang lalaki. Tam-is lang si Bogart kun magdulog sila sa kama. Apan sobra kamangtas kun mapilde sa sugal. Kay si Romana man ang pahimungtan.

Kadaghan na gireklamo ni Romana si Bogart sa ilang barangay kapitan bahin ning pagpamun-og sa adik-adik ngadto sa mamords nga kapuyo. Gitabangan si Romana sa kapitan aron mahusay sila. Apan gahi’g balatian si Bogart. Nagpabilin kining hait nga tunok sa kasingkasing ni Romana.

Hinungdan, nga dihang gikahibalag ni Robert si Romana sa One Pavillon Disco, dali ra silang nagkasinabtanay human iasoy  sa babaye ang iyang problema sa kinabuhi. Didto magsugod ang pagsige nila’g tagay sa lawasnong dugos nga maoy nakapasuod nila’g maayo. Hangtod nga gibiyaan ni Romana si  Bogart ug sila nang Robert ang naglib-in.

Gikabyonan sa kabug-at ang nawong ni Robert. Mahal kaayo niya si Romana. Ug dili siya gusto nga mawala kini kaniya. May laraw nga kalit lang milakdap sa iyang alimpatakan. Nakapanghupaw siya dungan ang pagtuaw: “Ako ka lang, Romana. Ako ka        langggg!!!”

Miabot ang adlaw nga magkita silang Bogart ug Romana -- ang adlaw nga gipangandaman ni Robert.

Didto sa Pusok Waiting Shade, nagbarog ang usa ka lalaki. Nagsige’g tan-aw sa iyang relo. Klaro kaayo nga may gipaabot. Taudtaod, dunay PUJ nga milabay ug mihunong sa unahan. Nanaog ang seksing babaye -- si Romana. Abtik ang lalaki nga misugat. Apan wala pa gani makalakang og layo, milanog ang masipang buto sa pistola. Daw saging gituba nga nahagba ang tawo, kinsa naintimano pagkaigo sa agtang. Ingon sa wala pa matagbaw ang nag-bonnet nga birador. Giduol pa gayod ang wala nay kinabuhing linalang ug walay kukaluoy nga gitusaktusak ang kalawasan sa laing lima pa ka mga bala.

Kalma ra ang mamumuno nga misakay sa nagpaabot nang daang motorsiklo daplin sa dalan. Wala na gani makita ang nanglupad nga mga papel gikan sa folder tupad sa nagbanaw’ng dugo.

Naamang si Romana nga nakasaksi sa kinatibuk-ang hitabo. Iyang gipunit ang napadpad nga mga papel ug naigking dihang nabasa ang unsay nahisulat niini -- ang kasabotan diay nilang duhang  Bogart nga dili na kini manghilabot kaniya hangtod sa hangtod, diin pirmahanan na lang nila ang maong mga papeles didto atubangan sa barangay kapitan. Naitlib ni Romana ang iyang mga ngabil. Wala siya makasabot sa iyang gibati. Angay ba siyang maglipay, o maguol? Dihang...

May duruha ka palad nga mipatong sa iyang abaga ug gihunghongan siya: “Ako ka lang, Romana!”

Napalingi si Romana. Ug maoy misugat sa iyang panan-aw si Robert. Nakurat ang babaye sa kalit nga pagbutho sa iyang kalib-in ning dapit nahitaboan. Ug labaw pa siyang nakurat dihang may pinong dugo nga namilit itaas og diyotay sa sidsid sa karsones ni Robert. (Kataposan)