Attorney never

Naabogado si Danny sa ikaduhang pagkuha og bar exams. Niagi siya’g kahagbong. Grabe ang mga biaybiay iyang nahiaguman pagkahagbong niya. Usa sa nibiaybiay niya, si Engr. Freddy Bulinod nga ilang silingan. Ginganlan siya’g “attorney never” ni Engr. Bulinod. Apan wa lang niya igsapayan kay nasayod siyang dili sayon ang pagpasar sa bar exams. Gani sa mga istorya pa, kada tuig human sa bar exams, duna gyu’y labing minus, tulo ka examinee nga mabuang.

Hinoon, nanaad si Danny nga mosuway lang siya’g katulo. Inig human sa ikatulo nga bar exams, kun hagbong gihapon siya, kalimtan niya ang ambisyon  nga mag-abogado. Pero wa na niabot og katulo, kay sa ikaduha niyang suway, nilampos na man siya.

Dihang nanglaban na siya, daghang mga kliyente ang nakauyon niya. Kay kugihan siyang motoon sa mga kasong iyang gigunitan. Ug tratahon niya nga usa ka higala iyang kliyente.

Wa nagdugay, nagpalaban si Engr. Bulinod ni Danny. Gilabanan niya. Kay lagi, silingan, unya suod nga higala ang enhinyero sa ugangan ni Danny. (Minyo na man siya pagkuha niya’g abogasya). Daghang mga problemang legal ang enhinyero nga nasulbad ni Danny. Ang pinakadakong problema kadtong nakasaghid si Carlo (anak ni Engr. Bulinod) og bata sa ilang sakyanan. Naospital ang bata. Naareglo ni Danny sa gamay rang gasto. Nagselebrar sila. Nibangka si Engr. Bulinod og dakong salusalo. Dihang init na ilang mga dunggan sa ilang nainom, nihisgot si Danny sa nanglabay.

“Wa lang damha Noy Freddy nga si “Attorney Never” maayong molaban nimo. (Isip manag- silingan nagmanoy ra si Danny sa enhinyero. Ug ang enhinyero nag-Danny lang sab sa abogado). “Kinsay Atty. Never, Dan?” ni Engr. Bulinod. “Ako. Di ba ginganlan ko nimo’g attorney never kaniadto?” ni Danny. “Wa tawon ko nagsulti ana oy!” daling nigar niya.  Apan taphaw. Unya napatiurok.

Wa na lang nipursiger si Danny sa pagpaangkon ni Engr. Bulinod. Kay wa nagtomotomo si Lira iyang kapikas. Nga usa ka higayong nagkasugat sila’s Lira ug Engr. Bulinod, gipangutana si Lira sa enhinyero sa pag-ingon  “Hain man imong bana? Si Attorney never?” “Pila ra man untay pag-ingon, pasayloa lang ko. Komedya ra tong ako,” tuaw ni Danny sa hilom.

Apan di gyud magbunga’g maayo ang biaybiay o bugalbugal sa nagbuhat niini. Kay si Carlo nga gradwado sab og abogasya, kaupat na nikuha og bar exams. Hagbong gihapon. Siya maoy kandidatong mahimong attorney never. (Kataposan) (Sa gusto’g libreng kunsulta, dad-a ning pahina sa sugilanon sa opisina sa tagsulat, sa Sabado’s buntag)