Ang gipakayab nga bandilang Pilipinhon

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Ang pagpakayab sa bandilang Pilipinhon higpit nga gidili sa sayo nga katuigan sa rehimen nga Amerikanhon apan tungod sa gipakitang kaisog ug kamatinud-anon sa atong katigulangan sa pagpakig-sakbang  niadtong unang gubat nga kalibutanon (World War 1) maoy hinayhinay nga nag-abli sa gitak-opang ganghaan sa kagawasan dihang giuyonan sa gobernador nga Amerikanhon pagpakayab nga gitaliwad-an sa bandila sa Estados Unidos hangtod sa Hulyo 4, 1946 nahingpit usab ang pag-angkon sa kagawasan.

Nagkadaiya ang mga desinyo sa bandilang Pilipinhon nga ang una mao kadtong gipakayab sa katukoran sa Katipunan sa tuig 1892 nga gipatikan sa tulo ka mga letra nga KKK nga nagpasabot og Kataastaasan, Kagalang-galang Katipunan nga nagpasabot og labing taas ug halangdon.

Gisundan kini sa ikaduhang bandila nga maoy gigamit kaniadto sa Nueva ni Heneral Mariano Llanera nga gisaway usab ni Andres Bonifacio ang desinyo sanglit gawas nga bulok itom, gibutangan pa gayod kini og kalabera sa tawo uban sa letrang K.

Ang ikatulong bandila nga gidesinyo na ni Pio del Pilar nga nagpakita og simbolo sa pagsubang sa adlaw nga gibutangan na usab og tulo ka mga litrang K nga wala gihapon kauyoni ni Bonifacio nga nakaaghat kaniya sa paghimo og laing desinyo nga bulok pula, adlaw ug tulo ka mga letrang K nga gipatik ug gisundan pa sa  ikalimang desinyo nga gimugna ni Emilio  Aguinaldo nga naghimo na usab og dugang pa nga mga kausaban niini.

Si Heneral Gregorio del Pilar nga giilang hero sa Tirad Pass naghimo usab og ikaunom nga desinyo hangtod nga ubos sa paggiya ni Heneral Emilio Aguinaldo namugna usab ang  gidesinyo nila ni Mrs.  Marcela Agoncillo ug Mrs. Delfin de Natividad nga pag-umangkon ni Dr. Jose Rizal nga mao na karon  ang gipakayab nga bandilang Pilipinhon.