Maria Magdalena - Gula 86

“Unsay apan?” nagkanayon si Daniel.

“Problema man gud usahay. Dili kita makalikay sa mga mangungutang. Ang uban ra ba tagdugay mobayad.”

“Pasagdi lang gud. Lisod man gud kaayo karong panahona. Pagpasensiya lang.”

Nagpasalamat ko kay wala na mopasupot og laing pangutana si Daniel. Nabalaka man gud ko nga tingali’g dili ko makatubag sa uban pa niyang mga pangutana. Kini laging sad-an ta sa atong bana, mag-amping gyud nga dili ta dudahan sa atong sinultihan. Mao nga mainampingon ko sa akong sinultihan sa higayon nga may ipangutana si Daniel kanako aron dili siya magduda nga naghimo ko’g milagro.

“Gusto kong makalarga dayon pagbalik sa gawas,” matud ni Daniel nga hilom kong gikahinangop kay misantop man sa akong hunahuna si Camilo.

Gusto pang manarbaho ni Daniel sa gawas. Gusto man gud siyang manarbaho pa kay alang niya, dili pa igo ang among tinigum sa bangko. Daghan siya’g mga plano alang sa among kaugmaon. Nindot ang iyang mga laraw nga kun matuman lang, segurado gyud nga moasenso kami. Maayo gyud diay nga bana ang nag-eskuyla sa pagka pari kay responsable kaayo.

Paglabay sa pila ka semana milarga si Daniel paingon sa Manila. Mi-report siya sa buhatan sa ilang ahensiya aron pag-follow-up sa iyang aplikasyon nga iya na diay’ng gihikay ug gikaduso sa ilang agency sa wala pa siya mopauli sa Cebu. -- Sumpayan pa