Wala magustohi

Dear Tita Salie,

Maayong adlaw. Usa ko sa liboan nga tigbasahan og Banat News. Sa una kanunay  ug kada adlaw gyod ko mobasa og Banat News ug labina sa imong column.

Usa ako ka inahan, Tita, apan dili asawa. Taga Negros ko apan karon ania ako diri sa Bantayan Island nagtrabaho isip usa ka tindera sa usa ka bakery kay taga diri man kining akong kapuyo karon.

Sa una dunay trabaho kining akong partner sa usa ka shipping lines. Apan ni-resign siya kay ako man siyang gipa-resign tungod kay nakauyab man siya didto og usa ka  kwartahan ug maoy nigasto kaniya ug gustong makigminyo sa akong partner. Ug iya ra ba kining gipanabi dinhi sa ilang lugar dihang didto pa kami nagtipon sa Negros.

Karon daghan kaayong manawag ngadto kaniya nga mga babaye. Makalagot usahay, Tita, dugangan pa sa iyang mama nga magsige og padungog-dungog og masakit nga pulong diri kanako.

Lisod ang akong kahimtang karon, Tita. Unsa may maayo  nakong buhaton niini? Palihug pasabta ko. Thank you very much and God bless.

* * *

Daghan kaayong salamat sa imong pagsunod sa atong column.

Nakadungog ka na ba sa panultihon alang sa mga seaman nga nag-ingon nga ang mga seaman kuno dili lang mga “seman luluko” sila sad giingon nga “in every port-report and in every place-replace.”

Ilado na gyud kaayo nga ang mga lalaki  nga nagtrabaho sa barko pang chicks kaayo. Bisan seguro ang uban wala’y hilig sa chicks apan naapil na lang sila sa maong tawag. Busa dili na gyod angay ikakurat sa imong partner tungod kay daghan gyod kini sila og suod nga babaye. Wala ko masayod kun unsay hinungdan niini, tungod ba kay daghan sila og kwarta ug basin duna pay laing hinungdan.

Mas maayo seguro nimong buhaton mao nga ayaw awaya ang imong partner. Hinuon, estoryaha siya sa hinay ug pakigsultihi mahitungod sa inyong kaminyoon. Ingna siya nga kun puyde iya nang putlon ang iyang communication ngadto sa lain-laing mga babaye tungod kay masakitan ka ug dili maayo nga masayran pa kini sa inyong mga anak.

Mas maayo usab nga inyong planuhon ang inyong kaminyoon ug mas maayo usab nga maningkamot mo nga molain pagpuyo aron dili kana makadungog og estorya nga bati sa imong ugangan. -- Tita Salie