Maria Magdalena

Gula 81

Giputol nako ang among relasyon ni Emilio. Nag-ilis ko’g SIM aron dili na siya maka-contact nako. Gisolo na lang ko ni Camilo.

Wala na gyud magsamok si Emilio kanako. Si Camilo na lang ang kanunay kong partner sa pagdula og kalayo. Misamot kasubsob ang among panagkita. Ug misamot usab ang kasagunson sa among sexual contact kay wala na man siya’y kabahin sa akong panahon.

Paglabay sa pito ka bulan, nananghid si Venus kanako nga mopahawa na siya sa iyang trabaho isip akong katabang. Duna siya’y plano nga adto manarbaho sa Manila.

“Dili ko ikaw pugngan, Venus,” giingnan ko siya. “Apan may ihangyo lang ko nimo. Mahimo ba?” “U-unsa man kana, Ate?” Sukit ni Venus.

“Kun unsay imong nasayran bahin nako, hinaut nga dili kini makaabot ngadto sa laing mga tawo. Sa laktod, ayaw ipanabi ni bisan kinsa ang akong binuhatan. Makalaom ba ko nga imo kanang buhaton?”

“Makalaom ka, Ate. Isaad ko kana kanimo.”

“Salamat.”

Gihatagan ko si Venus sa kompleto niyang suweldo ug ako pa siyang gipabawonan. Ug mipahawa dayon siya sa balay nga akong gipuy-an dala ang iyang mga gamit.

Sa dihang nag-inusara na lang ko pagpuyo sa balay, wala na ko mokuha og lain pang katabang nga makabanos sa mga bulohaton ni Venus. Gipangunayan ko na lang ang mga buluhaton sa balay. Gawas nga makadaginot ko sa gasto kay wala na man ako’y suweldohan, wala na usa’y makatugaw namo ni Camilo. -- Sumpayan pa