Manggiulawon

Gula 5

Sangko sa langit ang kalipay ni Jerson niadtong gabhiona kay gawas nga gisugot na siya ni Karlyn, nakaparayeg siya ug nakahawok pa gayud sa dalaga. Nagtoo na ra ba gayud unta si Jerson nga balibaran siya ni Karlyn ilabi na nga atul sa bakasyon wala na kini niya makontak.

Mora siya naglupad sa kalipay dihang mipauli sa iyang gipuy-an. Apan dihang didto na si Jerson sa iyang higdaanan ug gihanduraw ang matam-is nila nga pagparayganay ni Karlyn mikalit lang sa paghadla sa iyang kaisipan ang bahad kaniya ni Manny.

Nakasiguro si Jerson nga pwerteng sukoa ni Manny nga didto kaniya miuban si Karlyn. Samot na gayud kini nga masuko kun masayud nga aduna na sila’y relasyon ug ang dalaga. Pagka ugma, naglakaw si Jerson paingon sa tunghaan subay sa dalan Sanciangko.

Nalantawan ni Jerson nga nagpaingon usab si Manny sa iyang nahimutangan ug magkasugat gayud silang duha. Miduko si Jerson apan giandam niya ang iyang kaugalingon. Tuod, wala siya masayop kay dihang duol na kaayo sila, girombo gayud siya ni Manny.

“At last, nagkatagbo ra gayud ang atong dalan. Nasayud ko nga may gusto ka ‘sab ni Karlyn ug kinahanglang palay-an mo siya kun dili ka gusto og gubot!” misinggaak ang tingog ni Manny dungan sa pagsukmag ni Manny.

Nalihayan ni Jerson ang kumo ni Manny. Gisundan pa kini og laing sukmag apan wala gihapon makaigo si Manny kang Jerson. “May naantigohan ka diay ha mao nga nagsalig ka. Moabut ra ang imong adlaw,” bahad ni Manny kang Jerson.

Dunay nagsingabot nga patrol car sa kapolisan mao nga misibat si Manny. Gipaningot si Jerson sa paglihay nga dili siya maigo sa kumo sa iyang karibal ni Karlyn. Pagka gabii na, gihuwat na usab ni Jerson si Karlyn sa gawas sa classroom.

Dunay tulo ka lalaki nga mora’g dagway og bugoy nga diha usab sa gawas ug nagsultihanay. “Unsa kaha’y ipatrabaho kanato ni Manny no?” matud sa usa ka lalaki. “Karibal kuno niya kini sa iyang gwapa nga classmate,” tubag sa laing lalaki.

Pagkadungog ni Jerson dali kaayo siya nga nakasabot nga siya ang target sa maong tulo ka lalaki. Midali siya’g sibat apan nahuna-huna niya si Karlyn nga tingali pugson ni Manny pagpauban kaniya.

Mibalik si Jerson atubangan sa classroom apan nagmabinantayon siya sa iyang mga lihok, Gipanid-an niya ang lihok sa tulo ka lalaki. Gilab-as niya sa iyang huna-huna ang nakat-onan niya sa martial arts didto sa ila sa probinsya.

Nanggawas na ang mga tinun-an sa room nila ni Karlyn. - Sumpayan