Ang patakaran ni Jerome

Napulo ka tuig na nga drayber og taksi si Jerome. Karon ang pinakamalipayon niyang adlaw. Kay kining unit nga iyang gidrayban iya nang kaugalingon. Lima ka tuig niyang datadata sa iyang amo. Unya gahapon lang naimpas. Naggunit na siya sa deed of sale nga pinirmahan sa iyang amo. Wa pa gani niya marehistro. Gisulod niya sa glove compartment. Mapahiyumon siyang nagmaneho sa taksi ning sayong kahapunon subay sa recle. Unya, may nipara niya nga babaye’g lalaki.

Gihunongan niya. Gipasakay.

“Ihatod mi Dong sa pinakaduol nga motel” sa lalaki dihang nagkatupad na sila luyo sa drayber. Kay nia man siya sa rekle  nagdagan, Q5 ang naas hunahuna ni Jerome. Unya nagkinupogay dayon ang iyang mga pasahero nga mora’g gutom sa pakighilawas. Gilainan si Jerome sa lihok sa iyang mga pasahero. Nilili siya’g panagsa sa rear view mirror. Mora na sila’g mag-sex na gyud sulod sa taksi.

“Sir, Maam, puwede adto na na ninyo buhata sulod sa motel. Ayaw lang sa akong taksi” malumong pulong ni Jerome. Nilili sa rear view mirror.

“Way problema, Dong. Bana’g asawa man mi. Dili mi managkabit o manag-uyab lang” sa lalaki.

Naurong sa iyang gibuhat. Nitan-aw sa rear view mirror, aron magkatinan-away sila sa drayber pinaagi sa salamin. Unya nipadayon sa pagromansa sa iyang kuyog. Nakapanglab-ok og laway si Jerome.

“Bisan pag bana’g asawa mo, Sir. Kining taksi giila ko ning ekstensiyon sa akong panimalay. Akong kaugalingon ning taksiha. Di ko gustong dunay bisita nga mag-sex sa akong panimalay,” ni Jerome. Pintok na ang tuno.

“Sabta lang mi Dong. Lima ka tuig ming wa magkita sa akong misis. Kay abroad ko’g lima ka tuig,” sa lalaki.

“Dili na maoy rason Sir. Pila lang ka minutos, moabot na man ta sa motel. Agwantaha lang og kadiyot,” ni Jerome.

“Unsa may problema nimo! Moplete man mi bisa’g pila!” sa lalaki.

“Ako ning taksi. Duna koy patakaran sa akong taksi. Busa, kun di mo patuo nako, kanaug na lang mo. Sakay na lang mo’g laing taksi. Ay na lag bayri ang plug down”, ni Jerome. Nimaneho para padaplin ug nipahunong sa taksi.

Nanigang mga mata sa mga pasahero sa ilang kalagot. Nihunghong ang babaye sa lalaki.

“Sige. Padayon na lang. Kuti kaayo pangita’g laing taksi. Modistansiya na lang ko sa akong asawa. Mag-agbay na lang ko niya!” sa lalaki. Nipahiyom na lang ang babaye. Nipadayon og padagan si Jerome.

“Mahimo ba mangutana ko nganong ingon ini imong patakaran sa imong taksi?” Karon pa ko kasugat og taksi drayber nga ingon nimo!” sa lalaki. Nagpangagot ang bag-ang.

“Di lang ko gusto mabuwisit akong taksi. Kay lima ka tuig ni nakong maneho, wa pa gyud maaberiya. Ug gisaad nako sa Ginoo nga kun maimpas nako ang taksi, maako na, akong ilhon nga tipik sa akong panimalay ang taksi. Giila ta mong bisita. Ug di ko mosugot nga ang bisita magromansa sa akong panimalay. Mahadlok kong mabuwisit,” ni Jerome.

Nakapanglingo ang lalaki nga daw di makatuo sa patakaran sa drayber. (Kataposan