Ang inadlawan ni Inday Kyla

Layo pa gani ang ika alas dose sa kaudtohon, diha na si Kyla sa may bintana sa ilang payag, nga nag-atubang sa may karsada. Naghuwat siya nga muabot ang iyang amahan, gikan sa gitrabahoan niini. May gisaad man gud kaniya ang iyang amahan, una kini mobiya sa ila nianang buntag sayo. Ug giingnan gani siya niini nga papaabuton lang inig ka udto, kay duna siya’y dad-on alang kaniya.

Kasumaran man god karong adlawa sa adlaw nga natawhan ni Inday Kyla. Ug ikalima na ka tuig karon nga kasumaran, gikan sa iyang pagkatawo. Kay karon mang petsaha nga gipakatawo siya gikan sa sabakan sa iyang inahan. Ug siya maoy kinamanghuran, kanilang tulo ka managsuon.

Sa kadugay ni Kyla og pinaabot nga mahiuli ang iyang amahan, nahikatulog nalang nuon siya. Nga nag-akbo sa kordeso sa bintana. Inunlanan ang iyang duha ka mga bukton. Ug samtang natulog, nagdamgo na hinuon siya.

Sa iyang damgo, mikuyog kuno siya sa usa ka batang babaye nga susama kaniya’g pangidaron ug gidak-on. Gidapit man god siya sa maong babaye sa pagpanulod sa usa ka harianon kaayong panimalay. Nga mao diay ang puloy-anan sa maong bata nga midapit  kang Kyla.

Didto sa sulod sa maong balay dunay usa ka dako kaayong lamesa nga napuno sa nagkalain-laing mga lamiang pagkaon. Gidala dayon si Kyla sa batang babaye ug gipalingkod sa usa ka maanindot kaayong lingkuranan, nga diha sa may lamesa tupad kaniya. Tuyo diay sa maong bata nga magsalo sila sa pagpangaon ug si Kyla sa giandam na nga mga pagkaon diha sa lamesa.

Apan sa wala pa sila mosugod sa pagpangaon mitugtog una ang usa ka mananoy kaayong sonata. Ug nakita nalang ni Kyla nga dihay pipila ka mga batang babaye nga nanagsul-ob og puti nga mga sinina ang misayaw pasignunot sa sonata. Nalingaw kaayo si Kyla nga nagtan-aw sa mga batang nanayaw.

Human sa maong sayaw, misugod dayon sila si Kyla sa pagpangaon. Misalo kanila sa pagpangaon kadtong mga baang nanayaw. Natagbaw kaayo si Kyla sa mga lamiang pagkaon nga iyang gikaon. Kadto pa man god siya sukad makatilaw sa maong mga pagkaon.

“Happy birthday anak,” sa amahan pa ni Kyla nga mipikpik sa  iyang abaga. Ug maoy nakapaputol sa iyang damgo.

Gilugod una ni Kyla ang iyang mga mata ug human nangutana. “May dala ka pa?”

“Oo anak. Pinobre ra hinuon ni, apan kinasingkasing kong inadlawan alang kanimo,” sa amahan pa dayon og tunol sa iyang mga dala ngadto kang Kyla. Nga usa ka karton ug usa ka plastic bag.

“Ayay! Kanindot sa akong monyeka,” ni Kyla pa nga nakalukso sa hilabihang kalipay nga nagsud-ong sa inadlawan niya gikan sa iyang amahan. Nga may pakapin pang pancit cantoon ug lechon manok. (Kataposan)