Taksi drayber si Soting

“Sus, kanimo Ting mao ra gyud ni ang imong intrigo kanako nga kulang man gani ni ipalit og bugas para ipalamon sa imong mga anak!,” pinabundak nga tingog ni Talya ning sayong kabuntagon.

“Ada, unsaon man nga naplatan man sa ligid ang taksi nga gimaneho ko,” tubag ni Soting.

“Maayong mohunong ka sa pagdrayb ug mangita ka’g laing trabaho kun dili biyaan tika mangita ko’g foreigner bisa’g American Negro na lang,” bahad ni Talya.

Unom ka buok ang ilang mga anak unsaon batan-on pa silang nagminyo ug si Talya init og agresibo pa kaayo sa sex bisan og masangkilan lag gamay labi nag tugnaw kaayo ang kagabhion.

May barong-barong sila dinha sa may North Reclamation Area minaneho lang gyud aron makalikay sa abangan sa balay matag bulan dinhi sa siyudad.

Nag-abang siya sa taksi kada adlaw. Siya sab ang moabaga sa galastohan sa gasolina.

Maka ‘jackpot’ lang si Soting panahon sa sakay sa taksi sama sa Pasko, Kalag-kalag ug Pista Senyor kay daghang mga tawo ang modagsa sa Sugbo.

Dihay usa ka higayon nga nakapasahero siya og usa ka negosyanteng insik gikan sa Mactan Airport ug nagpahatod sa iyaha diha sa Ayala Business Park ning dakbayan. Apan sa pagkanaog niini gumikan sa pagdali-dali nabiyaan ang iyang clutch bag nga may sulod nga mga importanteng papeles ug may igong salapi.

Gibuksan ni Soting ang clutch bag ug nakita niya ang mga sulod niini.

“Hala! may kuwarta kining bag ug duna puy mga papeles.” Nakahunahuna sa makadiyot si Soting. “A, husto e uli ko ni kay dili ako ang tag-iya ini,” nakahukom si Soting.

Dali-dali niyang gihatod sa estasyon sa radyo ang maong importanteng butang ug gisibya dayon sa kahanginan. Wala gayod siya mapakyas kay diha-diha dayon may mitawag sa telepono ug gipahulat si Soting sa maong caller.

Paglabay sa pipila ka minutos, miabot ang nagpailang caller ug dali kining namay-ongan ni Soting. Ang pasahero niya kadtong insik.

“Maayo bay, kay giuli mo ang akong clutch bag importante kaayo kining mga papeles alang sa akong negosyo. Og isip ganti, dawata kining salapi isip premyo sa imong pagkamatinud-anon sa imong pagkatawo,” pulong pa ni Mr. Sy ang tag-iya.

“Ayaw na lang Mr. Sy, katungdanan kana namong mga taxi driver ang pag-uli sa butang nga mahabilin sulod sa among taxi,” balibad ni Soting.

“Mao ba?, sigurado ka?, pangutana ni Mr. Sy. “Sigurado gyud kaayo Sir,” mubong tubag ni Soting.

“Na hala, kay di ka man gyud modawat mosugot ka nga kuhaon tika isip family driver kay bag-ohay pang mi-resign ang akong driver?” sugyot ni Mr. Sy ug mipadayon siya. “Doblehon ko ang imong kita sa pagka-taksi drayber ug mahimong anha ka puyo lakip na imong pamilya sulod sa akong compound diha sa Ma. Luisa, Banilad,” tanyag ni Mr. Sy.

Dinhi nibathay ang pahiyom sa nawong ni Soting. Busa maayo gyud diay nga matinud-anon kita sa atong pagkatawo dinhi sa kalibotan! (Kataposan)