Cashier nga Guwapa Gula 7

Samtang nagpadayon ang pagparayganay nila ni Gina ug Ricky sulod sa kotse sa ulitawo, gibati sila og dili matukib nga kahinam. Mora’g misaka ang tagsa-tagsa nila ka blood pressure tungod sa nagkalami nila nga pagparayganay.

Kaganina ra nga walay hunong ang mga kamot ni Ricky sa paghapuhap sa kalawasan ni Gina nga maoy nagsugnib og talagsaong kainit ug kahinam sa dalaga. Ang wala nga kamot ni Ricky didto na naghapuhap sa paa ni Gina samtang ang tuo naghapuhap sa tuo nga kilid sa dalaga.

Matag karon ug unya, mag-ukobay ang masig nila ka mga ngabil. Mora’g nakabatyag si Ricky nga dili na siya makapugong. Duna siya’y gihung-hong kang Gina dihang milunga siya sa pag-ukob sa lumoy kaayong mga ngabil sa babaye.

“Unsa? Dili ko uy,” mibalibad si Gina sa gisulti ni Ricky kaniya. Apan wala mohunong si Ricky sa paghangyo sa dalaga. “Sige na Gin, adto na lang ta moorder og pagkaon. Promise dili ko ikaw pasagdan, ako ang mangamahan sa imong anak,” giingnan ni Ricky si Gina.

Wala motingog si Gina nga klaro kaayo nga gibati na usab og kahinam sa grabeng romansa nga gipabatyag kaniya ni Ricky. “Sige pero dili kaayo ta magdugay ha? Bantay ka bitaw kun imo lang ko nga pasagdan,” ni Gina pa nga mibai-id sa dughan ni Ricky.

Gipaandar pagbalik ni Ricky ang makina sa sakyanan ug mipadagan gawas sa Banilad Town Centre. Paspas ang pagpadagan ni Ricky sa sakyanan paingon sa Mandaue. Rombo niya mao ang usa ka motel sa North Reclamation Area nga nahimutang daplin sa dagat.

Diritso nga gipasulod ni Ricky ang kotse sa bakante nga grahe sa motel. “Suheto lagi kaayo ka dinhi, daghan ka na tingaling babaye nga gidala dinhi no?” matud ni Gina. “Wala, duna lay nagsulti nako nga amigo, si Ely nga tsikboy kaayo nga reporter,” matud ni Ricky.

Wala gayud mag-usik og higayon si Ricky dihang didto na sila sulod sa kwarto sa motel. Giromansa dayon niya si Gina ug gipabatyag sa makapabuang nga parayeg. “I love you Gina…I love you too Rick.”

Paglabay sa kapin sa duha ka oras nga kumbati. “Hala, tungang gabii na man, gipangita na g’yud ko karon nilang Mama. Unsaon kaha nako karon sa pagpangatarungan kanila,” mabalak-on kaayo si Gina.

“Sultihi lang sila nga mitambong ka sa proklamasyon ni Konsehal Labella kay gidala ka sa amiga nimo nga staff sa konsehal. Sagdi lang Gin, tabangan tika nga makasulod ka og trabaho sa City Hall aron moundang ka na sa imong pagka cashier,” matud ni Ricky. - Kataposan