Mga girlfriends

Dear Tita Salie,

Have a  wonderful day and I hope that you are in good health, Tita. By the way, just call me Mr. R.G. 19 years of age og usa ka ulitawo.

Ang akong problema mahitungod kini sa akong lovelife. Duna man gud koy mga girlfriends duha sila ka buok. Tagoon lang nato sila sa pangalan nga si Ms. T. ug Ms. B.

Dugay naming uyab ni Ms. T., eight years na ang among relasyon. Mahal kaayo nako siya, Tita, ug dako kaayo ang akong respeto kaniya busa wala gyud ko mangahas nga kutloon ang iyang kaputli. Maghuwat lang gyud ko sa hustong higayon.

Apan diri sa among dapit, usa ka higayon niana dunay gipahigayon nga disko ug nitambong ko. Didto sa diskohan akong nakaila si Ms. B. nalingaw ming duha samtang nagsige og sayaw busa nanguyab ko niya. Wala ko pakyasa ni Ms. B. ug nagkauyab gyud mi. Bisan pa man kun bag-o pa ang among relasyon apan naangkon na nako ang iyang pagkababaye. Iyang gipamatud-an diri kanako nga mahal ko niya. Tungod niini nahigugma na sad ko pag-ayo kang Ms. B, karon naglibog na hinuon ko, Tita, kun kinsa kanila ang akong pilion. Dili usab nako kayang bulagan si Ms. T. Unsa may akong buhaton? Palihog pasabta ko. Thank you, Tita.

* * *

Hello R.G.,

Nalipay ko tungod kay anaa pa diay kanimo ang respeto sa babaye. Apan nganong ang ikaduhang babaye si Ms. B, nga wala man nimo mahatag ang respeto nga imong gihatag ngadto kang Ms. T. Nganong imo man dayon gikuha ang pagkababaye ni Ms. B? Unsa may kalainan sa duha ka babaye? Dili ba angayan respetohan si Ms. B?

Seguro sa imong sulat, o sa sulod sa imong sulat naghatag kana daan og clue o giya kun kinsay imong pilion nilang duha. Ikaw na mismo nasayod kun kinsay maayong himuon nga asawa. Maoy hinumdomi nga ang asawa dili kay panglingawlingaw lang, dili panandalian lamang, walay contract nga mahuman kun dili lifetime kini nga kontrata sa asawa ug bana.

Kun nahimo nimo ang pagpakig-sex dayon ni Ms. B bisan kun sa diskohan lang mo nagkaila ug nagkauyab ako makaingon nga seguro nawagtang ang imong respeto sa mga babaye ngadto kaniya. Mao nga dali kaayo nimo siyang nahangyo.

Lahi usab ang akong nakita ni Ms. T. tungod kay just imagine 8 years na ang inyong relasyon apan wala gyud ka mangahas pagkutlo sa iyang kaputli. Nagtimaan lamang kini nga si Ms. T. ang matang sa babaye nga dapat respetohan. Busa nasayod ka na kun kinsay imong pilion. -- Tita Salie