Cashier nga gwapa

Wala dayon makatulog si Ricky nianang gabhiona paghiuli niya sa giabtan niya nga balay sa Barangay Tejero kay dugay kaayo nga napapas sa iyang pangisip ang giisip niya nga malipayong mga gutlo nga nagkauban sila si Gina sa unang higayon.

Apan may nakapahasol kang Ricky sa gisulti ni Gina nga aduna na siya’y anak ug sa kanhi niya hinigugma. Apan nakadayeg si Ricky kang Gina kay wala gayud kini magpanagana sa pagtug-an sa iyang kaagi ngadto kaniya bisan bag-o pa sila nga nagkahigala.

Gihuna-huna pag-ayo ni Ricky kun nakabantay ba kaha si Gina sa iyang mga sinultihan kaganina sa ilang panag-uban nga may gitagoan siya nga pagbati ngadto kaniya.

Gikuha ni Ricky ang iyang selpon nga diha sa bulsa sa iyang karsones. Gipahibalo niya si Gina nga nalipay kaayo siya sa ilang panag-uban ug nga gusto siya nga magkanunay sila nga magkakuyog.

Gibutang ni Ricky ang iyang selpon diha sa iyang ulohan ug gipiyong niya ang iyang mga mata sa pamasin nga ganoyon ra siya sa katulogon. Tuod, giabut ra gayud og duka si Ricky ug nakatagpilaw apan kalit lang siya nga nahipugwat tungod sa pagtingog sa message alert sa iyang selpon.

Nagpirat-pirat pa ang mga mata ni Ricky nga mitan-aw kun kinsa kaha ang nag-text kaniya nga gabii na man. Apan nawala ang iyang duka dihang nakita niya nga gikan ni Gina ang text message.

“Hapi sab ko nga nagkauban ta. Adtoa lang ko sa gitrabahoan kun gusto ka nga magkauban ta, wa man ko’y kauban pirmi sa pagpauli,” ni Gina pa nga mi-reply sa text message ni Ricky.

Gi-reply dayon ni Ricky ang text message ni Gina. “Thanks. Bawnon nako sa akong pagkatulog ang malipayon nato nga panag-uban ug nga lauman nako nga magkita kita karong taud-taud sa gingharian sa mga damgo.”

“Hehehehe. Sigi damgohon sab tika,” dali kaayo nga naka-reply si Gina. Pagkaugma, gabii na lang, wala pa gayo’y naproklamar nga bise mayor. Sikit kaayo ang mga botos nila ni Labella ug Young.

Nakadawat og text message si Ricky gikan ni Gina. “Pasudlan ba ang canvassing center? Gusto unta ko nga moanha diha.” Nasabtan ni Ricky nga gusto nga moadto si Gina mao nga iya dayon nga gi-reply.

“Dali sugaton tika sa silong dapit sa entrance,” ni Ricky pa. Tuod nagkita sila si Gina ug Ricky. Wala na gihapon magsul-ob sa iyang uniporme sa tindahan si Gina. Pagtangka nila sa ganghaan sa canvassing center mao g’yud ang pagsulod ni Konsehal Labella nga mao gayud ang labaw og botos pagka bise mayor.  (Sumpayan)