Cashier nga gwapa

“Hilig ka ‘sab diay og mga love songs Rick, ganahan kaayo ko sa imong mga tukar,” ni Gina pa dihang gitugtog ang awit nga nagkanayon “Love Comes from the Most Unexpected Places” nga nakahatag og talagsaong kahulugan alang sa dalaga.

“Ganahan ‘sab diay ka ana nga kanta Gin? Himoon nato kini nga theme song kay mora’g tukma usab kini kaayo sa atong panagsuod,” ni Ricky pa. Samtang nagdagan ang sakyanan nga ilang gisakyan, gisuginlan ni Ricky si Gina sa iyang gibati sa una pa lang niya nga pagkakita.          

“Daghan kaayo nga mga tawo nga naglinya didto sa imong counter apan bisan pa niini daw misidlak taliwala kanila ang madanihon mo nga panagway... ug wala dayon ako makasabot sa akong gibati niadtong higayona,” matud ni Ricky. “Balaknon ka man ‘sab diay Rick,” ni Gina pa nga nagpahiyom.

Dayon misulod na sila sa Banilad Town Centre. Nangita sila og kan-anan nga ilang kasudlan. Gipili ni Ricky kadtong kan-anan nga dili kaayo daghan ang customer aron nga magka-estorya gayud sila si Gina.

“Dugay ka na ba nga nagtrabaho sa department store? Kun makadaug gani si Konsehal Labella hangyoa nga makatrabaho ka sa City Hall,” sugyot ni Ricky kang Gina. “Tabangi ko Ricky kay dili man mi kaila si Konsehal Labella,” ni Gina pa.

Sa tanto nila nga panagsultihanay, wala kapugngi ni Gina ang pagpangutana kang Ricky kun wala pa ba kini kabilinggan. “I’m still single.. ikaw Gin?” dali nga nakatubag si Ricky nga gipaubanan pa og pangutana. Wala dayon motubag si Gina. “Apan bisan og dili ka pa mosulti, I know that you are also single kay maklaro man kaayo sa imong lawas nga dili pa minyo, seksi,” ni Ricky pa nga mihimo’g gamay’ng pag-ulog-ulog sa dalaga.

“Dili pa ko minyo pero duna na ko’y anak Rick. Wala mi magkadayon og sa akong boyfriend kay supak ang akong ginikanan kaniya kay wala lagi kuno’y trabaho,” saysay ni Gina sa iyang kaagi nga nakapasubo kaniya. “Sige dili lang usa ta maghisgot bahin sa imong kaagi, apan usa na lang ka pangutana, asa na karon ang imong boyfriend?” ni Ricky pa. “Wala na ko masayud apan akong nahibaw-an nga grabe ang iyang kahiubos nila ni mama ug giapil ‘sab ko kay wala gayud mukontak. Kini maoy rason nga mitrabaho na lang ko para mabuhi nako ang akong anak,” pasabut ni Gina kang Ricky. Human sa ilang pagpangaon, gihatud ni Ricky si Gina didto sa ilang balay sa Talamban. “Sige, take good care of yourself Gin, see you tomorrow and good night,” matud ni Ricky sa wala pa manaug si Gina sa sakyanan. (Sumpayan)