Maria Magdalena

Maoy gusto ni Daniel nga maninda ko’g sarisari ug bisan unsang baligyaon aron ako malingaw. Kadali rang nahuman ang pagtukod sa tindahan ug gisugdan dayon nako ang pagpaninda. Tuod man, nalingaw gyud ko. Mawala ang bation kong kalaay sa higayon nga mag-abi-abi ko og kustomer. Hinuon, makalagot pud ang mga mangungutang ilabi na kadtong tagdugay mobayad ug maglikay-likay pa. Pero sige na lang, kay apil man kini niining negosyoha.

Human sa tindahan, gipatigom na usab ko og kuwarta ni Daniel alang ipalit og jeep nga pasaheroan. Gusto niya nga inig pauli niya, makapalit na ko’g sakyanan. Tuod man, nakapalit gyud ko’g sakyanan. Gibuligan gyud sa kahitas-an ang mga pangandoy namo ni Daniel kay nakabaton man gyud kini’g katumanan.

Usa niana ka higayon sa akong pag-adto sa Cebu City aron magkuha og kuwarta sa bangko, gikahimamat ko si Emilio. Nagkaila kami kay pasahero man usab siya sa V-hire nga akong gisakyan. Kami ang nagtupad. Ug sa iyang pagpaila sa iyang kaugalingon kanako, usa siya ka ahente og mga tambal. Guwapo si Emilio.

Alang nako, nagbaton si Emilio og charisma nga wala kang Daniel. Kun ang kaguwapo maoy hisgotan, managsama silang duha. Pero dunay hiyas sa pagka-lalaki si Emilio nga wala nako makaplagi kang Daniel. Kini ang hinungdan nga na-attract dayon ko niya sa labing unang higayon sa among panaghimamat. Tungod ba seguro kay ahente siya ug maayo kaayong makig-estorya. -- Sumpayan pa