Maria Magdalena

Gula 60

Ingon sa nakakat-on na si Daniel sa paghigugma kanako kay litokon na man niya ang pulong “I love you” ilabi na sa panahon nga among tagayon ang lawasnong kalipay.

“Magtukod ta’g atong kaugalingong balay,” nagkanayon si Daniel usa ka higayon niana. “Bisan gud og dili kaayo dako basta ang importante atoang balay.”

“Kinahanglan pa ba gud nga magpatukod ta’g balay?” Matud ko. “Nia may balay nilang Papa ug Mama. Ako man ang makapanunod niini kay magpari man ang akong manghod.

“Mas maayo gyud kun duna tay kaugalingong balay aron atong masukod kun makabarog na ba kita sa kaugalingon natong mga tiil,” miinsister si Daniel.

Gitimbangtimbang nako ang gisulti ni Daniel. Natugkad nako nga husto ang iyang opinyon. Angay tuod kaming maglain pagpuyo gikan sa balay sa among ginikanan aron masuta kun makasugakod na ba kami sa pagpuyo sa kaugalingong paningkamot. Kanang pagpuyo nga dili na magsalig og ginikanan.

“Unya,” nako pa, “asa man ta’g igasto sa pagpatukod og balay?”

“May kuwarta pa man ko sa bangko,” tubag ni Daniel. “Dako-dako ang akong natigom kay daghan kaayo ko’g benefactors dihang nagtungha pa ko. Wala nako gastoha ang tanan kong kuwarta. Mangayo usab ako og panabang sa akong igsuon nga toa sa abroad.” -- Sumpayan pa