Birthday Gift

Gula 5

Ingon sa natuk-an si Lynlyn nga nakadungog sa gisulti ni Artemio nga gipangga siya niini.

Gipanid-an ni Art ang reaksyon ni Lynlyn. Klaro kaayo nga wala kini masuko sa iyang nadungog. “Nganong miingon ka man Art nga gipangga ko nimo?” matud ni Lynlyn.

“Na love at first sight ko nimo Lyn,” matud ni Art sa maaghop kaayo nga tingog. Mibalik na usab nga daw natuk-an ang dalaga nga nakadungog sa pagtug-an na ni Art nga nahigugma kini kaniya.

“Mao diay nga gihatagan ko nimo niining mahalon nga iPhone,” ni Lynlyn pa nga mitutok kang Art. Igo lang miyango-yango si Art apan dungan niini nga gigunitan niya ang tuo nga kamot sa dalaga.

Nagpahiyomay sila si Art ug Lynlyn. Bisan og walay mga pulong nga migawas sa ilang mga ba-ba, apan klaro kaayo nga nagkasabtanay na ang ilang mga kasing-kasing.

“I love you Lyn,” gipig-it paghugot ni Art ang kamot sa dalaga. Wala motingog si Lynlyn. Ingon siya sa nalukmay dihang nasayud nga may pagbati diay kaniya si Art.

“Sabton ba nako nga ang imong pagpakahilom Lyn nagpasabot nga may pagbati ka usab nako?” giingnan ni Art ang dalaga. Igo lang nga mipahiyom si Lynlyn.

Nakasabot na gayud si Art nga nahigugma usab kaniya si Lynlyn. Anam-anam kini niya nga gigakus ang dalaga.

“I love you too Art,” matud ni Lynlyn nga mibawos na sa paggakus ni Art. Nagginaksanay na sila’ng duha bisan og adunay mga tawo nga didto sa tindahan nga baligyaanan og mga seafoods.

“Dia ra ang inyong giorder sir,” matud sa usa ka food attendant. Gibayran ni Art ang ilang giorder nga pagkaon. Misakay sila’g taksi paingon sa balay nila ni Lynlyn sa Camputhaw.

Pagkanaug nila sa duol sa usa ka gasoline station didto sa Camputhaw, nanglakaw sila subay sa usa ka dalan-dalan hangtud nga miabot sila sa balay nga kilid sa duha ka tag-as kaayo nga condominium.

“Mao kini ang pinobre namo nga balay Art... dayon,” giagda ni Lynlyn si Art sa pagpasaka. Gisugat sila sa inahan ni Lynlyn. “Dia mi dala nga pagkaon Ma,” giingnan ni Lynlyn ang iyang inahan .

“Uy may bisita ka diay Lyn? Maayo kay nagdala mo og pagkaon kay wala ra ba g’yud tawon ta’y inandam,” matud sa inahan sa dalaga. “Gisultihan ko ni Lynlyn nang nga wala kamo mag-andam dinhi mao nga nakahukom mi nga magdala na lang,” ni Art pa.

Gisangpit sa inahan ni Lynlyn ang iyang amahan nga didto ra sa balay sa ilang silingan. Pag-abut sa amahan ni Lynlyn, nakurat kaayo si Art pagkakita niini. - Sumpayan