Erong buang

Heeeehhhh!!! Irong buang! Luwasa ninyo akong anak sa irong buang!” syagit ni Nang Lala, nga nakakita sa pagduol sa  usa ka iro nga kagiron, daot, galaway ang baba, gabaha’g ang ikog ngadto sa iyang anak nga si Timboy, 2 anyos nga nagkalingaw’g duwa sa iyang taraktarak nga nagyaka daplin sa basketan sa sitio Doomfree, Brgy. T. Aydilpa.

Naalibwag ang mga nagduwa’g lima-lima sa basketbolan pagkadungog nila sa singgit ni Nang Lala nga namaligya gawas sa ilang bay og ice water, mangga, buko juice, sigarilyo ug tsitsiryas. Nag-iyahay sila’g panagan padung sud sa ilang balay aron pagkuha’g hinagiban nga ilang ikabatok  sa irong uban, sama sa pospos. Diha poy nagdala’g sundang, martilyo, pistola ug kutsilyo.

Apan uwahi na silang tanan kay sa ilang pagbalik, diha nay usa ka tawo nga nanalipod sa bata ug maisogong nakigharong sa irong buang.

Usa ka tawo nga lalaki nga nagpilit ang tag-as nga buhok, naghukas, nagka-asete ang nawong ug lawas,  nagkagidlay sa gisi ang iyang karsones, nabulit sa buling, miguwa pa gani sa buslot ang iyang tirintin nga pwerti na pong itoma. Sa laktod usa pod siya ka buang. Usa ka tawong buang.

Nanghunong na lang ang  mga tawo nga buot mopatay sa irong buang. Nanghilom silang tanan. Naniga ilang mga mata nga nagsud-ong ning talagsaong panagtakos nga karon pa nila masaksihi sa tibuok nilang kinabuhi. Mora sila’g nanan-aw’g “Gladiator”. Dihay brgy. tanod mikuha sa bata ug gihatud ngadto sa inahan nga pwerting hilak tungod sa kakulba. Gigakos niya pagkugos iyang anak ug gihagkan sa aping.

Nagharong ang tawong buang ug irong buang. Mihupo ug mikamangkamang pod ang tawong buang sama sa irong buang. Nagtinutokay, nagpaminaway sila kung kinsay unang makapabor og hasmag. Dihay mga tawo nga nangodak ug nanguha’g videos gamit ilang mga cellphone cameras kay ila kunong i-upload sa You Tube.

Mitu ang laway sa irong buang. Mitu sab ang ihi sa tawong buang, nga mora’g si kamatayan ang lawas. Mingurob ang irong buang ug kalit nga miatake’g una. Gisiguro niini ang tirintin sa tawong buang nga abtik sang nakaatras.

Dihay nasaghiran nga tawo. Nakasuka tawon sa kabaho. Mibawos po’g atake ang tawong buang. Girumbo pod niini ang tirintin sa irong buang, nga abtik pong miatras. nagpuli-puli sila’g atake ug atras. Wa pa gyuy        napurohan.

Mora sila’g nag-cha-cha. Wa kabantay ang tawong buang, nasumbagan iyang nawong sa irong buang gamit ang right hook. Wingig siya. Ug nahayang kay napandol sa nag-igdal nga bato diha sa iyang luyo.

Gidumog siya sa irong buang. Nakigdumogay pod ang tawong buang sama sa mixed martial arts. Nakuyawan ang mga tawo ug mapildi ang tawong buang nga maoy nagluwas sa bata.

Apan sa kalit lang, nakuptan sa tawong buang ang duha ka kamot sa irong buang ug gisukmag niya’g maayo ang nawong niini gipakapinan pag siko. Ug gilambuyog paglabay ngadto sa bungbong sa usa ka koral nga semento nga maoy nakapukgo sa kinabuhi sa irong buang. Mikirig.

Namakpak ang mga tawo. Giabibahan nila ang tawong buang. Kalit nga may miwawaw. May miabot nga ambulansya sa mental hospital. Ug giaresto sa mga Nars ug Doktor ang tawong buang. Ug nangutana ang mga tawo “Kinsay pangan anang buanga, Dok? Mga Sirs?” gisud na sa ambulansya ang tawong buang nga naluya kay gituroka’g pangpakatug.

“Siya si Ernacius a.k.a. Erong,” matud sa Doktor, dayong sira sa pultahan sa ambulansya ug nagdaling milarga.

“Erong, ang iyang pangan?” matud sa mga tawo. Naglingiay sila.

“Mabuhay si Erong, buang!” matud ni nang Lala.

“Mabuhay!” tubag usab sa iyang mga silingan. (Katapusan)