Matinabangon

Gula 6

Human sa ilang pagpangaon, gitunolan ni Mr. Sim og bino si Lito nga higala sa iyang anak. Balibaran unta ni Lito ang gitanyag ni Mr. Sim apan nakahuna-huna siya nga tingali’g masuko unya ang Insik kaniya. Dili bansay nga moinom og ilimnon nga makahubog si Lito mao nga tulo ka shots, lain na kaayo ang iyang pamati.

Nakamatngon si Gemma nga ingon sa wala na mahimutang ang iyang higala nga nakainom sa gitunol sa iyang amahan. “Kaya mo pa ba? Mora’g tan-aw nako dili ka man bansay moinom og mga isog nga bino,” giingnan ni Gemma si Lito.

Gihunghongan ni Lito si Gemma nga mora siya’g nalipong. “Dili na unta ko moinom apan basin og masuko unya ang imong daddy.” Nakasabot si Gemma nga naikug lang si Lito nga mobalibad mao nga siya na ang mihangyo sa amahan.

Mitindog si Gemma ug miduol sa nahimutangan sa iyang amahan. “Ayaw na paimna si Lito kay dili siya anad sa inom, nalipong na kuno siya pero naikog lang nga mobalibad,” hunghong ni Gemma sa amahan.

Mipahiyom si Mr. Sim ug miyango-yango nga mitutok kang Lito. “Gemma dad-a usa si Lito didto sa terrace, patimplahi og coffee sa atong katabang. Dili ka diay bansay moinom og bino Lit?” ni Mr. Sim pa. Mibarug si Lito sa iyang gilingkoran. “Sori kaayo Mr. Sim kay dili ko anad sa inom.”

“Buotan kana si Lito pre, dugay na siya nako nga division head sa akong kompaniya ug swerte gani nga midawat sa gitunol nimo nga imported wine, dili kana moinom og ilimnong makahubog,” ni Mr. Lu pa nga tag-iya sa kompaniya nga gitrabahoan ni Lito.

Sa balkonahe sa balay nila ni Gemma, gipainom sa dalaga og coffee si Lito. Si Gemma gayud maoy nangunay sa pagtimpla. Anam-anam nga nahuwasan si Lito nga nakainum og coffee. “Wala ba diay moanhi ang imong boyfriend Gem?” gisukna ni Lito si Gemma.

“Nag-break na mi uy kay bati kaayo og batasan. Mata-pobre kaayo abi kay anak siya og tag-iya’g dakung hardware. Wala kaniya ang pagka makitawhanon, ug palahubog pa gayud” ni Gemma pa nga mipasabot.

Gibutyag ni Gemma nga wala usab makagusto sa iyang kanhi boyfriend ang iyang amahan tungod sa iyang pagka kusog nga moinum og ilimnong  makahubog. Nahuna-huna ni Lito nga makatabang diay kaniya nga dili moinum sa plano niya nga panguyaban si Gemma.

Nakabantay si Gemma nga si Mr. Sim nagsigi og lantaw kanila ni Gemma samtang tua sila nagsultihanay sa balkonahe sa ilang balay. - Sumpayan