Tulo ka matang sa tawo

Tindera si Beverly sa usa ka native fast food store sulod sa Food Court sa usa ka department store. Tingpaniudo ron. May babaye’g lalaki nga niabot. Ang lalaki nilingkod sa may bakanteng lamesa kinadul-an sa counter. Ang babaye namili og pagkaon. Nikuha og tray. Ni-order siya og duha ka rice, adobong kangkong, 1/4 kilo nga lechon, bam-i, sinugbang tangingue ug duha ka bottled water. Ang babaye ang nauna sa mga customer nga nakaduol sa cash register.

“Duna kay Senior Citizen’s ID, ma’am?” ni Beverly nga nipindot sa cash register aron sumadahon ang bayranan sa pagkaon.

“Tiguwang na gyud diay ko sa imong pagtan-aw?! 52 pa intawon ko oy!” sa babaye. Niping-it. Nisamot ka tiguwang tan-awon.

“Sorry, ma’am” napingi si Beverly.

“Kadto diay imong kuyog, wa toy Senior Citizen ID?” dugang ni Beverly nga nitan-aw sa lalaking naglingkod.

Daghan na’g puti iyang nipis nga buhok bisan wa pa naupaw. “55 pa intawon na siya oy!” sa babaye nisamot ka istrikta ang nawong.

“Sorry, ma’am” ni Beverly. Nag-apas man gud siya’g tip. Kay kadaghan na siya nahatagi’g tip dihang nipahinumdom siya sa mga ID sa mga senior citizens. 20% gud ang discount. Usahay ang customer makigtunga niya sa discount.

“Dalia na’g sumada Day. Kay gigutom na ko. Mawad-an man sab ta’g ganang mokaon, nimo!” sa babaye. Nagpanglingi sa iyang kauban.

“Sorry gyud kaayo, ma’am” ni Beverly nga halos nagpakiluoy ang tuno.

“Mag-amping ka sa imong paghusga sa hitsura sa tawo. Kay di baya maayo nga makapasakit ka’s balatian sa isig ka tawo,” sa babaye paghuman niya’g bayad sa gi-order. Nagmug-ot. Nidala sa tray sa pagkaon ngadto sa gilingkuran sa kuyog niyang lalaki.

Wa na lang nitingog si Beverly. Nanglipaghong sa kaulaw nga nayawyawan sa customer. Daghang nakadungog nga mga laing customer nga namili pa’g pagkaon. Ug may naamgohan siya. Mahitungod sa hitsura ug edad sa tawo, tulo ka matang ang tawo. Una, ang tawo nga tukma ra iyang hitsura sa iyang edad. Ikaduha, ang senior citizen na og edad, apan ang hitsura mas bata. Kini sila ang mapahiyomon nga mopakita sa ilang Senior Citizen ID. Usahay, dili pa matohoan ilang ID. Ikatulo, ang tawo nga wa pay 60 unya kapin na’s 60 ang hitsura. Kini sila maoy sakitan kun pangitaan og Senior Citizen ID.

Nakahukom siya nga sukad karon, dili na gyud siya mangita og Senior Citizen ID sa tanang customer. Kun may mopakita og Senior Citizen ID, maayo. Kun wala, labing maayo. Kay kun sa iyang kaugalingon, di diay lalim hunahunaon kun moabot siya’g 50. Unya pangayoan siya sa tindera og Senior Citizen ID kun dunay paliton. Sakit hunahunaon nga sa pagtan-aw sa tawo, mas tiguwang atong hitsura kay sa atong edad. Sakit gyud ang tinuod. (Kataposan)