Hubad sa Damgo

Good day Prof,

Sa pagkadalaga pa nako daghan ko og damgo nga mao ra gyud  akong madamgohan pirme...maong gusto ko mahibalo kun unsay buot ipasabot niini. Karon nga minyo nako wala na gyud kini mobalik pa bisan gusto nako nga damgohon pa.

1. Gadamgo ko nga nag alsa ko og dako kaayong bato.....gamay ra kuno kaayo ko pero nganong naalsa nako ug wala gani ko paningta.

2. Nagsaka ko og hagdan nga pwerteng taasa, ako ra gyud ang nakaabot sa kinatumyan ug ang uban nakong kadungan kutob ra man sa tungatunga.

3. Naligo kuno ko og dagat ug akong nakita ang usa ka dakong barko, ako kining gilangoy ug hangtod naabot ko sa barko ug nisaka kuno ko.

4. Ang katapusan kong damgo mao kining usa ka tawo, akong makita iyang pamarog o bayhon, apan wala siya’y nawong. Magsul-ob ni siya pirme og blue nga pants ug white nga t-shirt..pero bisag unsaon nako og tan-aw sa iyang nawong, wala man gyud....unsa may buot ipasabot niini?

Palihug pasabta ko sa akong mga damgo...maghuwat ko sa imong tubag. Daghang salamat. Regards. - Nice

* * *

Nice,

Kung karon nga wa na mobalik ang imong damgo, kay natuman na man ang kaholugan niini.

Ang permiro nimong damgo nagpasabot nga sa kadaghan ninyo (group of friends ba ron or sa kadaghan ninyo sa inyong pamilya), ikaw gyud ang hugot og baruganan. Ikaw ra ang naningkamot nga nilampos ba, basin og wa mulampos ang uban kay nisimang man ug wa na hinuon natuman ang ilang mga pangandoy sa kinabuhi. Dagkong bato na gani, mao na ang atong baruganan. Kung napusgay pa to, way ayo! Maayo lang ka sa istorya pero way baruganan.

Ikaduhang damgo nagpasabot nga imong nakab-ot ang imong mga pangandoy ug ang uban mong mga kauban, wa makalahos.

Makatawa ko sa imong ikatulo kay imo gyud nga gilangoy, nagpasabot nga sa una naglibog siguro ka kung asa ka dapit magsugod sa imong pagkab-ot sa imong damgo. Hangtod nga nakakita ka’g opportunity, maong imo gyud nga gilangoy hangtod nga nakasaka ka ug imong naangkon ang tanan.

Ika-upat nga damgo nagpasabot nga daghan man ang naibog nimo sa una, diba? Mao tong “wala’y nawong” kay naglibog ka kung asa nila ang imong pili-on! Karon nga minyo naka, natubag na imong damgo ug maong wa na mobalik pa. —Prof. Tata Swami

Atangi ang Hubad sa Damgo matag Miyerkules ug Sabado dinhi lamang sa Banat News. Alang sa inyong pangutana kabahin sa kahulogan sa inyong damgo, ipadala kana lang ni Tata pinaagi sa: [email protected].