Maria Magdalena - Gula 44

Sayon ra gyud alang namo ang pagpangita og hustong higayon. Buhong ko bahin sa sex. Pero bisan pa sa pagpakabuang nako kang Marcos, wala gyud nako pasagdi ang akong pag-eskuyla. Gituman gyud nako kanunay ang akong mga obligasyon sa tulonghaan.

Dihang natapos ang unang semester, mi-stand by ko og pipila ka adlaw sa Barili. Gimingaw na sab ko sa akong mga ginikanan maong midalikyat ko’g pauli sa among lungsod. Imbes nagplano ko nga mo-istar og duha ka semana sa amo nausab ang akong hukom pagkasayod nako nga mibakasyon usab diay si Elizar gikan sa Dumaguete. Dihang iyang nasayran nga nahiuli ako gikan sa siyudad, namisita siya kanako. Nananghid siya sa akong mga ginikanan nga makigsulti siya kanako.

Dili unta ko makig-atubang niya. Apan misantop sa akong hunahuna nga mas maayong magkasulti kami aron magkadinayganay kami ug dili siya molaom pa kanako. Busa gipakigsultihan ko siya. Gusto usab nako nga sultihan siya sa tinuod.

“Ayaw na ko’g laomi, Elizar,” matud ko. “May lain na kong boyfriend.”

Sa ingon ba lang niini kasayon, Maria,” ni Elizar pa, “imong putlon ang atong relasyon. May pinagsamahan baya ta kaniadto.”

Kalimti na ang tanan nga nahitabo nato. Basta kay mao na kanay akong hukom. Dugay ko rang giputol ang atong relasyon.”

Apan si Elizar wala mopatuo. Kada gabii siyang nagbalikbalik og pamisita nako mao nga bisan wala pa mapupos ang usa ka semana kong bakasyon, nakahukom ko nga mobalik na lang sa siyudad. Gitawagan ko si Marcos nga mobalikay nako sa siyudad. -- Sumpayan pa