Ang gugma nga alang sa inahan

Samtang nagpadayon paglawig ang barko nga gisakyan ni Jumel nagkalingaw usab siya’g sud-ong sa larawan sa usa ka babaye nga diha sa sulod sa iyang wallet. Bisan tuod og may pagkakaraan na kaayo ang maong larawan, apan naklaro pa gihapon ni Jumel ang dagway sa babaye nga diha sa maong larawan. Nga mao ang iyang inahan.

Mora’g gikumot ang dughan ni Jumel, samtang nagsud-ong sa larawan sa iyang inahan. Giabot na hinuon siya’g kamingaw, nga nagsigi’g hunahuna niini. Dugay na man god kaayo nga wala niya kini igkakita sa personal.

Ug kun nagkakita man gani, dugay na kaayo. Ug gamay pa lang gani siya niadtong higayona, ug wa pay igong kabuot. Dili gani siya makahimungawong sa tinuoray nga hitsura niini sa personal.

Nagpangidaron pa man lang og mga duha ka tuig, sa dihang gitalikdan si Jumel ug ang iyang amahan sa iyang inahan. Sigun pa sa mga sugilanon nga nabatian ni Jumel, nga mibiya kuno kanila ang iyang inahan, kay mikuyog man kini sa laing lalake.

Gani, bag-ohay pa lang nasayod si Jumel, kun kinsa gayud ang matuod niyang inahan. Naminyo man god og laing babaye ang iyang amahan. Ug gipatuo lang si Jumel, nga ang bag-ong gikapuyo sa iyang amahan, mao gayud ang matuod niyang inahan. Hinuon, pinangga siya sa maong babaye, nga mao gyud ang gipakaslan sa iyang amahan. Ug giisip gayud nga tinuod nga anak.

Kun di pa tungod sa sungog, di unta mahibawo si Jumel sa tinuod. Nga ang nagmatuto diay kaniya, di diay ang matuod niyang inahan.Gisungog man god si Jumel sa usa sa ilang mga silingan, usa ka higayon niana. Ug giingnan, nga anak og usa ka babaye nga kuragan. Kay ang matuod nga inahan niini, mikuyog man og laing lalake.

Sa sinugdan, hugot nga milimod ang amahan ni Jumel, sa dihang gipangutana kini niya sa gisungog kaniya sa ilang silingan. Nga lahi diay ang iyang inahan, ug dili mao ang nagmatuto karon kaniya. Nga mao gyud ang gikatipon karon ug gipakaslan sa iyang amahan.

Kay wa man gyud motug-an kaniya ang iyang amahan sa tinuod, didto na lang magpakisusi si Jumel sa ilang mga silingan. Ilabi na niadtong mga hamtong na, ug dugay na kaayo nilang nasilingan. Bisan si kinsa na lang ang iyang gipangutana, mahitungod sa iyang inahan. Hangtod nga diha gyuy nakasulti kaniya sa tinuod.

Ug mao kini ang hinungdan, kun nganong moadto si Jumel sa Manila. Maoy iyang tuyo nga pangitaon ang iyang inahan. Ug haw-ason kini, gikan sa iya karong nahimutangan. Ug dad-on og balik sa Sugbo, aron magtipon sila sa pagpuyo uban sa iyang asawa nga si Sheryl.

Alang god kang Jumel, bisan unsa pa kangil-ad ang iyang inahan sa mga mata sa uban, apan alang kaniya, angay gihapon kining gahinan sa tim-os ug tiunay nga pagmahal. Ilabi na, kay mao man kini ang nautangan niya’g kinabuhi. (Kataposan)