Pamakero

Matag Sabado sa hapon, mag-abot ang mga batang mamakero sa ilang mga hayop sa halapad nga bakanteng luna nga labong kaayo sa kasagbutan. Malipayon kaayo si Lino nga nagkabayo sa bukobuko sa turong kabaw nga iyang gibakerohan.

Maoy naandan nga sa matag adlaw nga way klase ang publikong elementaryang eskuylahan, si Lino ang gitahasan sa iyang papa nga maoy mamakero sa turong kabaw matag hapon.

Didto usab ang mga silingang kabataan ni Lino nga klasmeyt niya sa Grade Six, sila si Berto ug Erlan, nga namakero usab sa hayop nilang mga baka. Inigkabusog sa gibakerohan nilang mga hayop, magdungan dayon sila sa pagpainom niini sa sapa, nga haduol ra usab sa bakanteng luna.

“Sakyi ug kabay-i sab ninyo ang inyong mga baka samang mamakero, Bay Berto ug Bay Erlan...!” singgit ni Lino nga padayong nagkabayo sa bukobuko sa turong kabaw nga gibakerohan nga paspas kaayong nanibsib sa lunhaw’ng mga sagbot.

“Nindot kaayong kabay-an ang imong turong kabaw, Bay Lin, kay dako kaayo...!” ni Berto nga mikabayo dayon sa bakang gibakerohan.

“Bitaw! Lapad kaayo’g bukobuko ang turong kabaw ni Bay Lino!” mitimang sab si Erlan nga abtik sab mikabayo sa bukobuko sa gibakerohang baka.

Unya, kalit lang mibutho si Digoy, ang katalirungang bata nila ni Lino, Berto ug Erlan sa kasikbit nga baryo, nga nagkabayo usab sa iyang turong kabaw. Mikanaog si Digoy sa bukobuko sa iyang turong kabaw nga naggunit sa pisi niini.

“Maayo kay nag-abot ta’g pamakero, Bay Lino, uban sa atong mga turong kabaw! Pasungay ta, aron maila kinsay isog ug hawod sa atong mga turo!”

“Yahooo! Pasungay! Sige, pasungay mo’s inyong mga turo, Bay Lin!” misinggit si Berto.

“Sige, pasungauy mo, Bay Lin...!” misinggit sab si Erlan.

“Diko ko makipagsungay sa imong turo, Bay Digoy...!” pamalibad ni Lino nga mikanaog sa iyang pagkabayo.

“Sus, ayaw ko’g ingna nga talawan diay ang turo mong kabaw, Bay Lin!” ni Digoy nga miguyod sa iyang kabaw paingon sa nahimutangan sa turong kabaw ni Lino.

Kalit nga nangusmo ang duha ka turong kabaw nga nag-atubang. Nanukad. Wa nay nahimo si Lino. Gibuhian niya ang pisi sa iyang turong kabaw. Pipila ka gutlo, nagsungay dayon ang duha ka turong kabaw. Nagpakapaka ang mga sungay nga nagkapingkiay ug daw nagkayo ang nagpangidlap. Taudtaod, midagan ug mitalaw ang usa ka turong kabaw nga wala na makaagwanta sa sinungayay.

“Yiheeeeee! Midaog ang akong turong kabaw! Isog ang akong turong kabaw....” misinggit sa kalipay si Lino, uban nila ni Berto ug Erlan. Maulawon usab si Digoy nga misunod sa midagan niyang turong kabaw nga wala na makaharong pagtan-aw nilang Lino, Berto ug Erlan nga nagpadayon sa ilang pagpamakero nga sadya kaayo. (Kataposan)