Probinsiyana

Gula 5

“Wala ko magbugal-bugal nimo  Ging, tinuod bitaw nga ang imong batasan maoy nakapadani kanako nga amigahon ka,” giingnan ni Renante si Gingging. Nakahukom si Renante nga panguyaban na lang g’yud si Gingging bisan og bag-o pa kaayo sila nga nagkaila.

Iyang gisuginlan si Gingging nga sa una niya nga pagkakita sa dalaga nga nagpas-an og usa ka container nga tubig kaganinang hapon maoy nakahatag kaniya’g atensyon sa dalaga. “Unsaon gud nga ako man maoy kamaguwangan sa tanan namong magsoon ako g’yud ang molihok,” pasabot ni Gingging.

“May boyfriend ka na ba Ging? I’m sure nga duna na g’yud kay sa imong kaanyag imposible nga wala,” dugang ni Gingging.  “Sa una may classmate ko sa fourth year high school nga na boyfriend nako bali’g upat ka buwan pero nagkabuwag mi dayon,” sugilon ni Gingging.

Giangkon sa dalaga nga daghan ang nanguyab kaniya apan wala niya sugta. “Kun mao kana Ging, may tsans pa diay ko nga sugton nimo. I love you Ging,” matud ni Renante dungan sa pagpislit sa palad sa dalaga nga iyang gikatupad.

Mora’g natuk-an ug wala dayon makatubag si Gingging. Nakabantay si Renante nga sugton siya ni Gingging kay kun dili pa diha-diha unta siya nga balibaran. Gipahimudsan ni Renante ang higayon.

Bisan og nasabtan ni Renante nga may gusto usab kaniya si Gingging, apan wala na lang niya kini pugsa nga motangdo kaniya. Mibalik sila sa pagsayaw ug misamot ang ilang kasuod. Sa ilang pagpamauli, sikit na kaayo sila si Renante ug Gingging.

“Kanus-a ka mopauli sa siyudad Ren?” nangutana si Gingging kang Renante. Gitug-anan sa ulitawo si Gingging nga Lunes sa kaadlawon ang iyang plano nga mobalik sa siyudad.

“Maayo hinoon kay ugma, Domingo may kalingawan ‘sab dinhi sa among barangay sa Cabungaan,” matud ni Gingging. “Kun mao, makagakus na ‘sab diay ko sa akong naibgan,” nagpadungog-dungog si Renante kang Gingging. Wala motingog si Gingging bisan og klaro kaayo niya nga nadungog ang gisulti ni Renante kaniya.

Nagbuwag-buwag ang magbarkada pag-abot nila sa gamay’ng hawan duol sa ilang kabalayan. “Sige Ging, Rico, kita ta ugma,” matud ni Nympha sa iyang mga barkada.

Nagsultihanay usa sila kadiyot. Giubanan ni Renante si Gingging paingon sa ilang balay samtang nagpaabot ra si Rico sa iyang pagbalik. “Good night Gin, sweet dreams and remember I love You,” matud ni Renante. Mipahiyom ra si Gingging ug miwara-wara sa iyang kamot dayong sulod sa koral sa ilang balay.

“Tan-aw nako bay sugton ka g’yud ni Gingging kay klaro kaayo nga nakagusto siya nimo kay sa uban dili g’yud na magpapiit og gakus,” matud ni Rico ngadto sa higala. - Sumpayan