Probinsiyana - Gula 4

“Ngilngiga ninyo ni Gingging bai uy, nakalimot na man mo sa pag-undang pagsayaw,” nagngisi si Rico nga nangomedya sa iyang amigo.

“Kauwaw uy, kita na man lang diay ang nahabilin nga nagsayaw,” nanabon sa iyang nawong si Gingging samtang nagpahiyom ug mipasalipod sa uban niyang mga barkada.

Gisaysayan ni Renante si Rico nga nakalimot siya nga nahuman na diay ang tukar tungod sa kaanindot sayawan ni Gingging.

“Bitaw bai, tan-aw nako ninyo nga nagsayaw kaganina mora’g hasta ang hangin maglisud og lusot sa duha ninyo ka lawas, grabe’ng piita,” matud ni Rico.

May mga barkada ni Gingging nga midason sa pagkomedya sa duha. “Bitaw, dili man g’yud unta magpapiit og gakus kini’s Gingging pero ngano kaha nga piit man kaayo sila si Renante nga nagsayaw,” matud sa barkada nila nga si Nympha.

“Klaro na kaayo oy nga nagkatagbo ang duha ka dalan nila ni Gingging ug Renante. Sigi bai kay aron magminyo dayon mo,” matud ni Rico. Mitanyag si Renante nga manginum sila’g bugnaw nga softdrinks sa duol nga tindahan ug siya’y mobangka. Misamot nga si Renante maoy nahimong bida sa grupo.

Si Renante pa gayud maoy mitunol sa softdrink ngadto ni Gingging, ingon man sa usa ka cup cake. “Nasuya g’yud mi ninyong duha uy, bag-o pa gani mo nga nagkaila apan sweet na kaayo mo’ng duha,” subli nga sungog ni Nympha sa iyang amiga.

Human nila’g snack nanayaw pagbalik ang magbarkada. Mihatag ‘sab g’yud og lugar ang magbarkada ngadto kanila ni Gingging ug Renante.

Kanunay na sila’ng magpares og sayaw ug sama sa gihapon, bigay-tudo si Gingging nga nagpagakus lang ni Renante. Bisan wala pa sila’y relasyon, apan daw girlfriend na ang pagtagad ni Renante kang Gingging.

Mipahuway pagsayaw ang magbarkada ug didto nanglingkod kilid sa sayawan nga adunay lingkoranan. Nagtupad paglingkod sila si Gingging ug Renante.

“Biyaan mo usa namo ha kay manayaw mi kadiyot, balik ra dayon mi Ging,” matud ni Nympha.

Nakasabot si Renante nga gihatagan g’yud sila’g higayon sa mga barkada ni Gingging nga magkasultihanay og maayo. Gigunitan ni Renante ang palad ni Gingging.

Iyang nahikap nga dili kaayo hamis ang palad sa dalaga, nagpasabot nga trabahador si Gingging. “Kubalon ra ba kaayo na’ng akong palad Ren kay motabang man gud ko nila ni Papa ug Mama sa among uma,” pasabot ni Gingging. Ang gitug-an ni Gingging nakapasamot pagdayeg ni Renante sa dalaga. “Ikaw maoy gipangita sa akong Mama nga mahimo niya nga umagad Ging,” matud ni Renante.

“Saba diha uy, binuangan lang g’yud ko nimo abi kay taga probinsya ra ko,” matud ni Gingging. - Sumpayan