Maria Magdalena - Gula 37

“Adto ta mangaon sa McDo sa Basak,” maoy tubag ni Marcos. Ug nanakay mi og jeep paingon sa Basak. Sa outlet sa McDo, misulod kami. Si Marcos nay nangunay sa pag-order sa among pagkaon. Kay dili na man kaayo daghan ang mga kustomer, nakapili ko’g lamesa nga nahimutang sa nasuok nga bahin sulod sa kan-anan. Didto ko mopahimutang samtang naghulat kang Marcos nga nag-order sa among pagkaon.

Wala madugay, miduol si Marcos sa lamesa nga akong giokupar nga nagsapwang na sa tray nga gipatungan sa among pagkaon. Gipahimutang niya ang mga pagkaon sa lamesa. Ug nangaon dayon kami. Giganahan ko sa pagkaon kay pulos akong paborito ang gi-order ni Marcos. Makamao gyud ning tawhana da. Matud ko sa hilom.

“Unsa may atong panagsultihan?” Gisukit ko si Marcos samtang nagpadayon kami sa pagpangaon. Gusto kong masayran dayon ang buot niyang pakigsultihan nako.

“Unya na lang, ha,” niya pa. “Mangaon una ta.”

Wala na lang ko mamugos. Gitibawas namo ang pagpangaon. Pagkahuman, miagda si Marcos kanako nga manggawas na kami sa outlet sa McDonald nga among gisudlan.

“May panagsultihan man kaha ta?” Giingnan ko siya.

“Unya na lagi,” matud niya. “Mangita ta’g dapit nga magkasulti ta’g maayo.”

Mipara siya’g taxi. Nanakay dayon mi. May gihunghong si Marcos sa driver. Miyangoyango kini nga daw nakasabot sa iyang gisulti. -- Sumpayan pa