Hain na ang mga karo?

Sa miaging Biyernes Santo, samtang padulong mi mag-Station of the Cross sa San Pedro Calungsod Chapel sa South Road Property (SRP), ubay-ubay’ng prosesyon ang among naagian. Apan nakalitan ko, dihang sagad sa mga imahen, wala na itungtong og karo. Kadaghanan, gisakay na’g kotse, pik-ap, mini-van ug uban pang matang sa mga behikulo. Hain na man diay ang mga karo?

Giganoy ko sa halawom nga paghinuktok. Ang krus bug-at. Walay ligid. Wala kini guyora ni Hesukristo. Gipas-an gyud gikan sa patag ngadto sa bukid sa Golgota. Tapos, pag-abot ngadto sa kinatas-ang bahin, gilansang pa gyud siya sa nagdupang kahoy nga maoy iyang gipas-an. Puno sa sakripisyo ang iyang gitudlo kanato. Matang sa kasakit nga maoy gusto niyang ipasunod. Mipatalinghug ba kita?

Karo lang, kapoyan na tang moguyod ug motulod? Wala man gani kapoya si Hesukristo nga balabag maoy iyang gialsa. Biyernes Santo. Mao kini ang adlaw nga tingpuasa. Ang adlaw sa pagsakripisyo. Ang adlaw nga angay’ng ipakita nato, mga Romano Katoliko, nga kita miduyog sa mga pagpasakit sa atong Manluluwas. Apan sakit kaayo paminawon, nga ultimong pagguyod ug pagtulod sa karo, ingon sa gilikayan na sa atong mga kabag-ohan.

Unsaon man nato pagsinati sa kapait sa apdo nga gipainom sa mga Hudeyo ngadto kang Kristo, kun maoy palabihon ta ang paghimo sa luhong sakyanan nga maoy sakyan sa mga imahen, imbes ang naandang karo? Di ba, mas lami mang paminawon nga manglakaw tanan samtang mikuyog sa prosesyon kay sa magsakay og kotse?

Ang atong giparada sa kadalanan dili mga Miss Mutya, Miss Binibini o Miss Universe. Kun dili mga Santos, Santas ug mga Santo Intiero mismo. Sama sa gibuhat ni Pope Francis I, wala sila maanad nga maoy puy-an ang kabuhong. Maoy ilang gisangyaw nga mas nindot puy-an pirme ang pagpaubos. Kay kinsa kadtong magpaubos, ipataas. Ug kinsa kadtong magpataas ipaubos. Hinumdomi ang gitugon sa Ginoo ngadto sa iyang mga tinun-an. Matud pa Niya, ay: “Ang dili kaantigong mosunod sa akong mga pulong ug binuhatan, wala gyu’y luna didto sa Langit. Ang dili kaantigo moalsa sa krus nga akong gipas-an, dili gyud makaangkon sa kalipay’ng walay kinutoban.” Pastilan, karo lang gani, kapoyan nang mobitad ug motulak ang mga tagtungod. Awto gyu’y sakyan; gawas nga way abog, bugnaw pag irkon!

Dili maayong tugtan sa simbahang Katoliko kining maong praktis nga maoy makatabon sa tiunay’ng kahulogan nganong gisaulog nato ang pagkamatay ni Hesukristo. Makawagtang kini sa kabalaan sa sakripisyo nga napanunod ta sa atong mga katigulangan. Gani, kanhi sa bata pa ko, mag-ilog gyud among silingan kinsay makatulod ug makabitad sa karo panahon sa Biyernes Santo. Ngano? Tungod kay inig katapos sa prosisyon, bation gyud nila ang kapiskay sa kabaskog sa ilang lawas ug kalag.

Archbishop Palma, alang kanimo kining artikuloha. Hinaot pa unta nga maaksiyonan dayon kini sa imong kasingkasing. Lisod ning pasagdan. Basig moabot ang higayon nga pulos mga de makinang sakyanan na lang ang kargahan sa mga rebulto nga iprosesiyon, diin ang mga bag-ong tubo dili na makakita sa orihinal nga karo nga maoy pahimutangan kanunay kanhi sa patay’ng lawas sa atong Ginoo.