Maria Magdalena

Kaming tanang mga boarders giaporan og duplicate nga yawe sa dakong pultahan sa balay. Busa bisan gi-lock kini sa sulod, dili kami maglisod sa pagsulod kay makahimo man kami pag-abli niini. Wala usay limitasyon bisan unsang orasa kami mopauli sa kagabhion kay ang tag-iya sa boarding house aduna may laing balay sa Banawa Hills. Moanhi lang siya sa boarding house kun maningil na sa binulan namong bayranan o ba kaha may lain nga gustong moabang og kuwarto, ug aron usab pagtan-aw kun adunay mga ayohunon.

Midiretso ko sa lawak nga akong giokupar. Human makailis, mihigda dayon ko. Gibati ko ang tumang kakapoy. Apan luyo sa kakapoy diha ang katagbawan. Natagbaw ako sa nahitabo tali namong duha ni Marcos. Kun itandi ko ang iyang performance ug ang performance ni Elizar kaniadto, layo ra kaayo si Elizar. Mas expert si Marcos bahin sa sex. Tingali, dili usab ako ang unang babaye sa iyang kinabuhi. Pagkaugma, sayo kong naligo ug namahaw. May klase man gud ko nga magsugod sa 7:00 sa buntag. Dili angay nga maulahi sa klase kay major subject ra ba kini nako ug estrikto pa gyud ang among maestro, mao kini ang higayon nga mogamit mi og computer laboratory.

Samtang nag-ilis na ko sa akong uniform nga pang-school sulod sa akong kuwarto, mitingog ang message tone sa akong cellphone. Akong gisusi kun kinsay nagpadala nako’g text. -- Sumpayan pa