‘45 Minutes’

Gula 2

Nahibulong si Berting kun nganong nasayud si Liza sa iyang contact numbers nga dili man sila ka-text mate. Apan dali ra siya nga nakahuna-huna nga tingali didto si Liza nakakuha sa iyang numero sa selpon ni Tiago nga iyang barkada.

Gisubli niya pagbasa ang mensahe ni Liza. Nagsaysay kini sa kasinatian niya uban ni Tiago nga human sa ilang panag-inum misuway unta kuno pakigtagay og kalipay kaniya apan gidaug sa gahum sa alak ug nakatulog.

“Unya nadismaya ka diay karon Liz kay nakatulog man si bay Tiago?” gikomedyahan ni Berting ang asawa sa iyang barkada. “Mao g’yud. Wala baya ko mahimutang Bert sa giingon nimo ganina nga kun ikaw moabut og 45 minutos ang kumbati usa nimo humanon,” matud ni Liza.

Nakapahiyom si Berting nga nagbasa sa text message ni Liza. Mora siya’g nakasabot nga nagmahay gayud si Liza sa iyang bana nga wala makapalipay kaniya. Wala tubaga ni Berting si Liza nga ingon sa dunay gipasabot kaniya.

Apan mitingog ang ringtone sa selpon ni Berting. Wala ma-record sa phone book ni Berting ang numero apan mao kini ang numero sa selpon ni Liza. Gitubag ni Berting ug nadungog niya ang paraygon kaayong tingog sa babaye.

“Bert, ayaw’g saba ni Tiago nga nanawag ko nimo ha. Wala man gud ko makatulog nga maghuna-huna sa imong giingon nga paabton nimo og 45 minutos ang kumbati sa kama uban sa usa ka babaye ilabi na’g gwapa,” matud ni Liza.

Nagkatawa si Berting nga naminaw sa gisulti kaniya ni Liza. “Bitaw Liz, kun ako maoy Tiago nga imong bana, buhian tika kun bugnaw na,” matud ni Berting nga nagkatawa. “Ayaw gud pagbinuang diha Berting, anhaon tika ron,” ni Liza pa.

“Dali huwaton tika,” gikomedyahan ni Berting ang asawa sa iyang barkada. Dali kaayo nga giputol ni Liza ang ilang panaghinabi. Naghinuktok si Berting kay nasabot niya nga gustong mosuway si Liza sa giingon niya nga 45 minutos nga kumbati.

Si Berting ra maoy ulitawo kanila’ng magbarkada. Tungod sa iyang pagka chick boy, dili siya mabuwagan sa tambal nga makapadugang sa kaabtik sa lalaki sa pakigkumbati ug babaye ibabaw sa kama.

Wala madugay, mitingog na usab ang ringtone sa selpon ni Berting. Gikan gihapon ni Liza ang tawag. Iya kining gitubag. “Dia na ko sa atubangan sa inyong balay Bert,” ni Liza pa. Gikulbaan si Berting kay wala siya magtoo nga tinud-on ni Liza ang iyang gisulti nga moadto kaniya.

Naglibog siya’g unsay iyang himoon. “Pangitaon ka unya ni Tiago nga wala ka sa inyong balay,” gisukna ni Berting si Liza. “Basta makainum, buntag na kana siya nga makamata,” dali nga tubag ni Liza. - Sumpayan