Silingan

Alas singko sa buntag. Nigawas na sab ang managtiayong Andy ug Chona sa balay giabangan sa ilang anak nga si Myrna usa ka Interior Designer. Kuyogkuyog sila’g asa puyo ilang bugtong anak kay retirado na sila nga magtutudlo. Pension na man lang ilang gisaligan. Ug kulang usahay tungod sa mga tambal ilang gimintin. Puro sila may dayabitis.

Ug gipaninguha nila nga kun madala sa lawas, mag-hike sila kada buntag. Nakita na sab nila sa unahan si Mr. Valencia nga nagbarogbarog atubangan sa iyang convenient store. Nitalikod si Mr. Valencia pagkakita nga nagdangadanga ang managtiayon.

Maguwang si Mr. Valencia sa tag-iya sa balay nga giabangan ni Myrna. Mas adunahan si Mr. Valencia kay ni Manuel nga wa kaabot og napulo ka balay gipaabangan. Landscaper iyang trabaho ug nag-sideline og pamaligya og ornamental plants.

Pito ka bulan na silang nagpuyo sa balay ni Manuel. Di layo sa maong balay ang mga condominium ug town houses nga gipaabangan ni Mr. Valencia. Gawas sa dakong convenient store ,may negosyo sab si Mr. Valencia nga water purifying station. Maong garbosuhon si Mr. Valencia. Nagtoo siya nga kay adunahan siya, di siya mouna og tagad sa mga silingan. Siya gyud ang unahon og tagad. Maong mutalikod siya kun dunay kaila na magkaduol.Kay ang kaila mao gyud ang angay mouna og tagad.

“Maayong buntag, Mr. Valencia” ni Andy nga mapahiyomon. Niyango lang si Chona sa silingan.  “Oy!” Mao ray tubag ni Mr. Valencia. Mahal kaayo og pahiyom.

Nisaylo ang managtiayon nga nagtagsa’g sambilay sa ilang abaga og reserbang t-shirt nga ilisan kun panington na sila.

“Nganong motagad man gyud ka anang tawhana? Nga garboso man na?” ni Chona dihang layo na sila nga di madungog sa  silingan.

“Pagkatinood, mahimo gud kun di  ta motagad. Kay di man lang sab siya motagad. Gani, nagtoo man seguro na siyang nitagad ta niya, kay adunahan siya. Ug gusto lang makighigala og adunahan,” ni Andy.

“Di ra ba gyud na maoy atong tumong nga motagad ta. Motagad ta kay silingan,” ni Chona.

“Mao lagi. Di man matulon sa atong batasan kun di ta managad. Naandan man nato na motagad man gyud ta’g silingan, pag-ila’g gugma sa silingan” ni Andy.

“Kun kana siya, di ta na lang na tagdon. Kay mora ma’g molupa ang atay. Nga kita gyu’y mouna og tagad niya” ni Chona.

“Naa ra nimo kun di ka motagad. Wa may pinugsanay. Apan ako mopakita man gyud ko’g gugma sa isig ka tawo. Ma pobre ka’g madatu. Kana lang pagtimbaya, igo na na para nako” ni Andy.

“Kun di siya motagad nimo?”ni Chona.

“Ok ra para nako. Iya ra nang problema. Kun di siya mahigugma sa silingan sama sa iyang kaugalingon. Apan ako, isip pagpailag gugma sa silingan, motimbaya gyud ko niya. Problema na na niya kun wa siya’y gugma sa isig ka tawo” ni Andy.

“Nganong ingon ana man sab imong prinsipyo?” ni Chona.

“Mahulog man gud nga nagpakaaron-ingnon ko kun di ko makighigala sa silingan. Kada gabii ni’g katulog nako, magpasalamat ko sa Diyos sa kinabuhi. Nangayo na ko’g pasaylo sa akong mga sala. Ganihang sayong buntag, pagmata nako, nagpasalamat na sab ko sa Diyos nga nakamata pa ko. Nindot kanunay akong gibati nga buhi pa ko. Busa, motagad gyud ko’g silingan isip paghibawo sa Diyos nga nalipay ko nga buhi pa” ni Andy. Nahilom si Chona. Nihangad sa mga panganod nga nianam na’g kasanag sa banagbanag. Daw hilom nga nagpasalamat sa maayong panahon. Wa nag-ulan. Bugnaw ang hangin sa ilang pag-hike. Wa nay ikadugang pangutana si Chona. Nakasabot na siya’s iyang bana. (Kataposan)