"45 Minutes"

Nagkapundok ang magkabarkada nga sila si Boy, Roland, Berting ug Tiago kay nagkasabot sila nga maglingaw-lingaw. Usa ka botelya sa imported nga bino ang gidalit ni Boy dihang gisugdan na ang hudyaka.

Sagad sa himoon sa mga lalaki, ang ilang kasinatian sa mga babaye maoy himoon nila nga sumsoman sa panag-estorya. Nanghambog dayon si Tiago nga magpangita g’yud kuno ang mga babaye  tungod kay mahigalam.

Nanghambog si Tiago nga wala gayud kuno’y babaye nga dili mahigalam kaniya kay maayo siya nga moarte ibabaw sa kama. Apan wala makapugong sa pagtingog ang iyang puyo-puyo nga si Liza. “Ummmmm... nanghambog baya tawon si Tiago. Dili man gani maabtan og dies minutos humanon na man nimo ang kumbati nga dili pa matagbaw ang kontra, ayaw na’g hilas-hilas Tiago,” matud ni Liza.

Pwerteng hugyaw og pangatawa nila ni Boy, Roland ug Berting nga nakadungog sa komentaryo sa puyo-puyo ni Tiago. Mora’g nahilaw sa kauwaw si Tiago nga gibuko sa iyang puyo-puyo. “Mao ba bay Tiago? Dies minutos human na ang kumbati? Pastilan, kun ako’y natumong sa imong dapit bay nga gwapa kaayo ang asawa, paabton nako og usa ka oras. Kun dili man moabut og oras basta kay labing minus 45 minutos,” matud ni Berting nga nagngisi.

Mihilom ang magbarkada. Silang tanan didto mitutok kang Berting ug gitan-aw nila kun wala ba magkomedya lang ang higala.

Gisaysayan sila ni Berting sa iyang kaagi nga dihay usa ka babaye nga hagit-hagiton kaayo, wala g’yud mahigawad sa kabatid ni Berting sa pagpahigayon og malungtarong kumbati sa kama.

“Basta kay ang babaye na ang mohural nako ug magpakilooy nga humanon ang kumbati kay kapoy na kaayo sila,” dugang pamahayag ni Berting.

Gihatagan ni Berting og pipila ka pagtulon-an ang iyang mga higala kun unsaon nga makalahutay sila’g dugay. “Ang usa sa inyong himoon mao nga kun anaa na kamo sa aktwal nga kumbati, ayaw paghuna-huna sa eksena nga inyong gihimo, lain ang huna-hunaa samtang padayon kamo sa pagtrabaho,” ni Berting pa.

Nakapanglingo-lingo ang amigo ni Berting samtang nagtutok kaniya. Apil si Liza nga mitutok pag-ayo ni Berting nga higala sa iyang kapuyo.

Kaadlawon na nga nagbuwag-buwag ang magbarkada. Dugay nga nakatulog si Berting. Takulahaw lang nga mitingog ang iyang selpon...dunay nag-text

“Kang Berting ni numero kanang amigo ni Tiago?” matud sa nag-text kang Berting nga ang numero wala ma-phone book sa selpon ni Berting.

Gitubag ni Berting ang text message og taud-taud nagpaila ang sender sa message nga siya kadtong kapuyo ni Tiago. “Tan-awa Bert, si Tiago misuway og kumbati pero wala gani makahuman, natulog na lang sa kahubog.” (Sumpayan)